Mohammed Siraj Controversy : “त्याचं नाव सिराज आहे म्हणून…”, भारतीय प्लेइंग इलेव्हनमधून मोहम्मद सिराजला वगळल्याने काँग्रेसच्या खासदाराचे वादग्रस्त वक्तव्य
MP Imran Masood on Mohammed Siraj : काँग्रेस खासदार इम्रान मसूद यांनी वेलिंग्टन कसोटीच्या अंतिम ११ खेळाडूंमधून मोहम्मद सिराजला वगळण्यावरून एक वादग्रस्त वक्तव्य केले आहे.

MP Imran Masood sparks controversy over Mohammed Siraj’s exclusion : वेलिंग्टनच्या बेसिन रिझर्व्ह मैदानावर न्यूझीलंडविरुद्ध खेळल्या जात असलेल्या पहिल्या कसोटी सामन्याच्या प्लेइंग इलेव्हनमधून वेगवान गोलंदाज मोहम्मद सिराजला बाहेर ठेवल्यामुळे मोठा वाद निर्माण झाला आहे. हा क्रीडा क्षेत्रातील विषय आता थेट राजकारणाच्या वर्तुळात पोहोचला आहे. विद्यमान वर्ल्ड टेस्ट चॅम्पियनशिप चक्रात भारताचा सर्वात यशस्वी गोलंदाज असूनही सिराजला बेंचवर बसवणे अनाकलनीय असल्याचे म्हणत अनेक स्तरांतून या निर्णयावर तीव्र नाराजी व्यक्त केली जात आहे.
काँग्रेस खासदार इमरान मसूद यांचा गंभीर आरोप –
काँग्रेस खासदार इमरान मसूद यांनी सिराजच्या निवडीवरून भारतीय संघ व्यवस्थापनावर जोरदार टीका करत या मुद्द्याला थेट त्याच्या नावाशी आणि ओळखीशी जोडले आहे. सिराजची अलीकडची कामगिरी संघात स्थान मिळवण्यासाठी पुरेशी होती, असे सांगत मसूद म्हणाले की, “त्याचे नाव सिराज आहे हेच त्याला बाहेर ठेवण्यासाठी पुरेसे कारण नाही का? चांगली कामगिरी करूनही त्याला डावलले जात असेल, तर यामागे दुसरे कोणतेही कारण असू शकत नाही,” असा खळबळजनक आरोप त्यांनी केला.
चार वेगवान गोलंदाजांच्या ताफ्यातही सिराजला स्थान नाही –
#WATCH | Delhi: On Cricketer Mohammed Siraj, Congress MP Imran Masood says, “It is being said that despite his good performance, he was not given a place in the team. His name is ‘Siraj ‘, and that is why he was not given a place. If you are not selecting him despite his good performance, the discrimination is clear.”
— ANI (@ANI) November 20, 2026
वेलिंग्टन कसोटीसाठी भारतीय व्यवस्थापनाने चार वेगवान गोलंदाजांसह मैदानात उतरण्याचा निर्णय घेतला. यामध्ये जसप्रीत बुमराह, प्रसिध कृष्णा आणि आकाश दीप यांच्यासोबत युवा गोलंदाज अंशुल कंबोजला पदार्पणाची संधी देण्यात आली. डब्ल्यूटीसी चक्रात सर्वाधिक विकेट्स घेणारा अनुभवी गोलंदाज असूनही सिराजला संघाबाहेर ठेवण्याच्या या रणनीतिक निर्णयामुळे क्रिकेट चाहत्यांमध्येही मोठी चर्चा सुरू झाली आहे.
फलंदाजी प्रशिक्षक सितांशु कोटक यांचे स्पष्टीकरण –
दुसरीकडे, भारताचे फलंदाजी प्रशिक्षक सितांशु कोटक यांनी सिराजला बाहेर ठेवण्याच्या निर्णयाचे पूर्णपणे समर्थन केले आहे. पहिल्या दिवसाचा खेळ संपल्यानंतर बोलताना ते म्हणाले की, कर्णधार आणि व्यवस्थापनाने खेळपट्टीची परिस्थिती पाहून सर्वात मजबूत संघ निवडला आहे. संघाचे सर्वोत्तम संतुलन साधण्यासाठी हा निर्णय घेतला गेला असून, त्यामध्ये काहीही चुकीचे नसल्याचे कोटक यांनी स्पष्ट केले.





