BRICS Summit 2026 : ब्रिक्स शिखर परिषदेपूर्वी शुक्रवारी पंतप्रधान नरेंद्र मोदी आणि रशियाचे राष्ट्राध्यक्ष व्लादिमीर पुतिन यांची द्विपक्षीय भेट झाली. या भेटीत भारत-रशिया संबंध, ब्रिक्समधील सहकार्य तसेच पश्चिम आशिया आणि काळ्या समुद्रातील संघर्षांवर चर्चा झाली.

दोन्ही नेत्यांनी विविध बहुपक्षीय मंचांवरील भारत-रशिया सहकार्याचा आढावा घेतला. २०२६ मध्ये भारत ब्रिक्सचे अध्यक्षपद भूषवत असल्याने ब्रिक्सशी संबंधित मुद्द्यांवरही चर्चा झाली. यासोबतच प्रादेशिक आणि जागतिक पातळीवरील सामायिक हिताच्या विषयांवर दोन्ही नेत्यांनी विचारविनिमय केला.

पश्चिम आशिया आणि काळ्या समुद्रातील संघर्षांचा आंतरराष्ट्रीय सागरी व्यापारावर परिणाम होत आहे. तसेच भारतीय नाविकांच्या सुरक्षेचा प्रश्नही निर्माण झाला आहे. या पार्श्वभूमीवर पंतप्रधान मोदी यांनी संघर्ष सोडवण्यासाठी संवाद आणि मुत्सद्देगिरी हाच मार्ग असल्याचे स्पष्ट केले. शांततेसाठी सुरू असलेल्या प्रयत्नांना भारत सहकार्य करण्यास तयार असल्याचेही त्यांनी सांगितले.

भारतीय नाविकांच्या सुरक्षेचा मुद्दा महत्त्वाचा –

पश्चिम आशिया आणि काळ्या समुद्रातील परिस्थितीचा जागतिक सागरी व्यापारावर परिणाम झाला आहे. त्यामुळे भारतीय नाविकांच्या सुरक्षेबाबतही भारताने चिंता व्यक्त केली. या आव्हानांवर मोदी आणि पुतिन यांच्यात चर्चा झाली.

भारताच्या ब्रिक्स अध्यक्षपदाच्या काळात रशियासोबत बहुपक्षीय मंचांवरील सहकार्य वाढवण्यावरही भर देण्यात आला. संघर्ष वाढवण्याऐवजी संवाद आणि राजनैतिक प्रयत्नांतून तोडगा काढण्याची भारताची भूमिका पंतप्रधान मोदी यांनी पुन्हा स्पष्ट केली.

पुतिन यांचे मोदींना रशियाचे निमंत्रण –

राष्ट्राध्यक्ष व्लादिमीर पुतिन यांनी पंतप्रधान नरेंद्र मोदी यांना २४व्या भारत-रशिया वार्षिक शिखर परिषदेसाठी रशियाला येण्याचे निमंत्रण दिले. मोदी यांनी हे निमंत्रण स्वीकारले आहे.

मात्र, पंतप्रधानांच्या रशिया दौऱ्याची तारीख अद्याप निश्चित झालेली नाही. दोन्ही देशांच्या सोयीनुसार राजनैतिक माध्यमातून दौऱ्याची तारीख ठरवली जाणार आहे.

भारत-रशिया वार्षिक शिखर परिषद ही दोन्ही देशांमधील धोरणात्मक भागीदारीसाठी महत्त्वाची मानली जाते. या बैठकीत संरक्षण, व्यापार, ऊर्जा, तंत्रज्ञान, गुंतवणूक तसेच प्रादेशिक आणि जागतिक प्रश्नांवर सहकार्याचा आढावा घेतला जातो.

दरम्यान, १८ वी ब्रिक्स शिखर परिषद १२ आणि १३ सप्टेंबर २०२६ रोजी नवी दिल्लीत (भारत मंडपम) होत आहे. यात ११ सदस्य देश आणि विविध भागीदार देशांचे प्रतिनिधी सहभागी होणार आहेत.