वडगाव मावळ – तालुक्यातील कचऱ्याच्या गंभीर प्रश्नाकडे प्रशासनाचे लक्ष वेधण्यासाठी महाराष्ट्र नवनिर्माण सेनेच्या कार्यकर्त्यांनी शुक्रवारी मावळ पंचायत समिती कार्यालयात अनोखे आंदोलन केले.

निवेदन देण्यासाठी गेले असता गटविकास अधिकारी आणि इतर अधिकारी उपस्थित नसल्याने संतप्त झालेल्या कार्यकर्त्यांनी त्यांच्या खुर्च्या दालनाबाहेर काढल्या. या खुर्च्यांवर कचऱ्याचे बुके ठेवून तसेच तालुक्यातील कचऱ्याच्या समस्येची छायाचित्रे कार्यालयात चिकटवून निषेध व्यक्त केला.

मावळ तालुक्यातील विविध गावांमध्ये आणि सार्वजनिक ठिकाणी कचरा साचत असल्याने नागरिकांना त्रास सहन करावा लागत आहे. या समस्येवर उपाययोजना करण्याची मागणी घेऊन मनसेचे पदाधिकारी गटविकास अधिकाऱ्यांना निवेदन देण्यासाठी पंचायत समितीत गेले होते. मात्र संबंधित अधिकारी उपस्थित नसल्याने कार्यकर्त्यांनी नाराजी व्यक्त केली.

त्यानंतर त्यांनी खुर्च्या कार्यालयाबाहेर काढून त्यावर कचऱ्याचे बुके ठेवले. तालुक्यातील कचऱ्याच्या समस्येची छायाचित्रे कार्यालयात लावून प्रशासनाचे लक्ष वेधण्याचा प्रयत्न केला. या आंदोलनात मनसेचे तालुकाध्यक्ष अशोक कुटे, सचिव सचिन चव्हाण, उपाध्यक्ष मोझेस दास आदींसह कार्यकर्ते सहभागी झाले होते.

दरम्यान, पंचायत समितीच्या सभापती सुनीता येवले आणि उपसभापती साहेबराव कारके यांनी मनसेचे निवेदन स्वीकारले. तसेच पदाधिकाऱ्यांकडून कचऱ्याच्या समस्येबाबत माहिती घेतली. मनसेने केलेल्या मागण्यांवर योग्य ती कारवाई करण्याचे आश्वासन त्यांनी दिले.

Dolasnath Temple : डोळसनाथ मंदिरात फुगडी, दांडिया अन् भोंडल्याचा उत्साह