Miraj News : गणेशोत्सवाच्या पार्श्‍वभूमीवर मिरज शहरातील कायदा व सुव्यवस्था अबाधित ठेवण्यासाठी जिल्हा प्रशासन, पोलीस आणि सांगली- मिरज- कुपवाड महापालिका प्रशासन (Miraj News) सज्ज झाले आहे. गणेश विसर्जन मिरवणूक शांततेत आणि सुरळीत पार पडावी, यासाठी जिल्हाधिकारी मैनाक घोष, पोलीस अधीक्षक तुषार दोशी आणि महापालिका आयुक्त संजिता मोहपात्र यांनी मिरजेतील विसर्जन मार्गाची संयुक्त पाहणी केली.

मिरज शहरात गणेश विसर्जन मिरवणुकीला मोठी परंपरा असून मुंबई आणि पुण्यानंतर राज्यातील सर्वाधिक काळ चालणाऱ्या विसर्जन मिरवणुकांमध्ये मिरजेच्या मिरवणुकीचा समावेश होतो. त्यामुळे यंदाच्या गणेशोत्सवात गर्दीचे नियोजन, वाहतूक व्यवस्था, कायदा व सुव्यवस्था तसेच विसर्जन प्रक्रिया वेळेत पूर्ण करण्यावर प्रशासनाकडून विशेष भर देण्यात येत आहे.

गणेशोत्सव मंडळे, शांतता समिती तसेच संबंधित घटकांच्या बैठका घेऊन प्रशासनाने आवश्यक त्या सूचना दिल्या आहेत. विसर्जन मिरवणुकीत कोणत्याही मंडळामुळे अनावश्यक विलंब होणार नाही, याची विशेष खबरदारी घेण्यात येणार आहे. विसर्जन मिरवणूक (Miraj News) रेंगाळल्यास किंवा नियमांचे उल्लंघन झाल्यास संबंधितांवर थेट कायदेशीर कारवाई करण्याचा इशारा प्रशासनाने दिला आहे.

महापालिकेकडून शहरात चार ठिकाणी गणेश विसर्जनाची व्यवस्था करण्यात आली आहे. विसर्जन प्रक्रिया जलदगतीने पूर्ण करण्यासाठी आवश्यक यंत्रणा सज्ज ठेवण्यात येणार असून गणेश तलाव येथे अतिरिक्त क्रेन तसेच गॅस कटरची व्यवस्था करण्यात आली आहे.

विसर्जन मार्गावरील अडथळे दूर करण्याबरोबरच रस्त्यांवरील खड्डे तातडीने बुजविण्याच्या सूचना देण्यात आल्या आहेत. तसेच मिरवणुकीच्या मार्गावर भटकी जनावरे आणि कुत्री येणार नाहीत, यासाठीही महापालिकेकडून आवश्यक उपाययोजना करण्यात येणार आहेत.

दरम्यान, विसर्जन मिरवणुकीदरम्यान गणेश मंडळाच्या कार्यकर्त्यांनी मूर्ती सोडून जाणे किंवा मिरवणूक विनाकारण रेंगाळविण्याचा प्रकार केल्यास संबंधितांवर कठोर कारवाई केली जाणार आहे. विसर्जन मार्गावर मूर्ती सोडून कार्यकर्ते निघून गेल्यास त्यांच्यावर गुन्हे दाखल करण्याचा इशारा पोलीस अधीक्षक तुषार दोशी यांनी दिला आहे.

विसर्जन मार्गावर अतिरिक्त सीसीटीव्ही कॅमेरे बसविण्यात येणार असून पोलिसांचा बंदोबस्तही वाढविण्यात येणार आहे. कायदा व सुव्यवस्था राखण्यासाठी राज्य राखीव पोलीस दलाच्या तुकड्याही मिरजेत तैनात करण्यात येणार आहेत.

मिरजेत गणेशोत्सव सुरळीत पार पाडण्यासाठी जिल्हा प्रशासन पूर्णपणे सज्ज आहे. गणेशोत्सव मंडळे आणि शांतता समितीच्या बैठका घेण्यात आल्या आहेत. महापालिकेकडून चार ठिकाणी विसर्जनाची व्यवस्था करण्यात आली असून विसर्जन मिरवणूक रेंगाळणार नाही, यासाठी आवश्यक त्या उपाययोजना करण्यात आल्या आहेत.
– मैनाक घोष (जिल्हाधिकारी, सांगली)

गणेश विसर्जन मिरवणुकीत कोणताही अनुचित प्रकार घडणार नाही, यासाठी पोलिसांकडून विशेष दक्षता घेतली जात आहे. विसर्जन मार्गावर अतिरिक्त सीसीटीव्ही कॅमेरे बसविण्यात येणार असून राज्य राखीव पोलीस दलाच्या तुकड्याही तैनात करण्यात येणार आहेत.
– तुषार दोशी (पोलीस अधीक्षक, सांगली)

महापालिकेकडून गणेश तलाव येथे विसर्जनाची व्यवस्था करण्यात आली आहे. विसर्जन वेळेत पूर्ण करण्यासाठी अतिरिक्त क्रेन आणि गॅस कटरची व्यवस्था करण्यात आली आहे. विसर्जन मार्गावरील सर्व खड्डे तातडीने बुजविण्याचे काम पूर्ण करण्यात येणार आहे.
– संजिता मोहपात्र (आयुक्त, सांगली- मिरज- कुपवाड महानगरपालिका)