Minister Chandrakant Patil | राज्याचे उच्च आणि तंत्र शिक्षण मंत्री चंद्रकांत पाटील यांच्या निवासस्थानी कोथरुड मतदार संघातील पाणी आणि रस्त्यांच्या संदर्भात एक बैठक पार पडली. या बैठकीला पुणे महानगरपालिकेच्या विविध विभागांचे अधिकारी उपस्थित होते. कोथरूडमधील रस्ते आणि पाणी प्रश्नासंदर्भात मंत्री चंद्रकांत पाटील यांनी आक्रमक भूमिका घेतली असून येत्या आठवड्याभरात यासंदर्भातील अहवाल सादर करण्यास सांगितले आहेत. त्यानंतर पुढची बैठक घेण्यात येणार आहे.

या बैठकीत पाटील यांनी कोथरुडमधील पाणीपुरवठ्यातील अडचणींची माहिती घेतली. या भागातील अनेक ठिकाणी चढावर असल्याने नागरिकांना समान पाणीपुरवठा होण्यास अडचणी निर्माण होतात. त्याअंनुषंगाने समान पाणीपुरवठा व्हावा, यासाठी महापालिकेच्या उपाययोजनांचा आढावा पाटील यांनी या बैठकीत घेतला.

प्रामुख्याने सुतारदरा, किष्किंधानगर, केळेवाडी या भागातील पाणीपुरवठ्यावर परिणाम होत असल्याचे सांगण्यात आले. त्यावर उपाय म्हणून लोकसहभागातून वस्ती भागाच्या सुरुवातीला पाण्याच्या टाक्या उपलब्ध करुन देण्यात येतील. तसेच या टाक्यांमध्ये महापालिकेने पाणी उपलब्ध करुन द्यावे, अशी सूचना पाटील यांनी दिली.

या बैठकीत रस्त्यांच्या कामांसंदर्भातील प्रश्नांवरही चर्चा करण्यात आली. चांदणी चौकातील मुख्य महामार्गालगत एकलव्य महाविद्यालय येथून जाणाऱ्या १५ मीटरच्या रस्त्याचा प्रश्न अद्याप का प्रलंबित आहे, अशी विचारणा पाटील यांनी अधिकाऱ्यांकडे केली. गेल्या काही काळापासून बाणेर बालेवाडी भागातील रहिवाशांकडून नाट्यगृह उभारण्याची मागणी सातत्याने केली जात आहे. तसेच कोथरुडमध्येही शास्त्रीय नृत्यासह इतर सांस्कृतिक कार्यक्रमांसाठी संकुल उभारण्याची मागणी केली जात आहे. या पार्श्वभूमीवर या कामासाठी येणारा अपेक्षित खर्च याचा अहवाल सादर करण्याच्या सूचना मंत्री चंद्रकांत पाटील यांनी केल्या आहेत.