Mexican President on Trump।  अमेरिकन निवडणुकीत विजय मिळवल्यापासून, डोनाल्ड ट्रम्प त्यांच्या विस्तारवादी योजनांमध्ये व्यस्त आहेत. कधीकधी तो कॅनडा अमेरिकेत विलीन करण्याबद्दल वक्तव्य करतात तर कधी ते पनामा आणि ग्रीनलँडच्या ताब्याबद्दल विधाने करत असल्याचे दिसून येत आहे. त्यांनी अलिकडेच मेक्सिकोच्या आखाताला अमेरिकेचे आखात असे संबोधण्याचा आग्रह धरला होता. पण आता मेक्सिकोच्या राष्ट्राध्यक्षांनी ट्रम्प यांना त्यांच्याच भाषेत उत्तर दिले आहे.

मेक्सिकन राष्ट्राध्यक्ष क्लॉडिया शेनबॉम यांनी डोनाल्ड ट्रम्प यांच्यावर सडकून टीका केली आहे.  त्यांनी अमेरिकेला मेक्सिकन अमेरिका म्हटले पाहिजे असे म्हणत ट्रम्प याना उत्तर दिले आहे. डोनाल्ड ट्रम्प यांना लक्ष्य करत त्यांनी पत्रकार परिषदेत जागतिक नकाशा प्रसिद्ध केला. या नकाशात अमेरिका ‘मेक्सिकन अमेरिका’ म्हणून त्यांनी दाखवले. नकाशा दाखवत क्लॉडिया यांनी,”अमेरिका मेक्सिकोच्या आखाताला अमेरिकेचे आखात म्हणण्याचा प्रयत्न करत आहे, मग आपण अमेरिकेला ‘मेक्सिकन अमेरिका’ का म्हणू शकत नाही? ते खूप छान वाटेल ना? असे खोचक विधान देखील त्यांनी यावेळी केले. तसेच १६०७ नंतर अपात्झिंगन हे मेक्सिकन अमेरिकेतील पहिले राज्य होते. म्हणून आपण अमेरिकेला मेक्सिकन अमेरिका म्हणूया. असे त्यांनी यावेळी म्हटले.

डोनाल्ड ट्रम्प यांनी मेक्सिकोच्या आखाताचे नाव बदलून अमेरिकाचे आखात असे करण्याचा सल्ला दिला होता. खरंतर, ट्रम्प २० जानेवारी रोजी अमेरिकेच्या अध्यक्षपदाची शपथ घेणार आहेत. काही दिवसांपूर्वी, मार-ए-लागो येथे बोलताना त्यांनी मेक्सिकोच्या आखाताचे नाव बदलून अमेरिकेचे आखात करण्याबद्दलही बोलले होते. यावेळी त्यांनी “अमेरिकेचे आखात किती सुंदर नाव आहे आणि ते अगदी योग्य आहे. मेक्सिकोमध्ये कार्टेल चालवत आहेत. ते खूप धोकादायक ठिकाण बनले आहे. अमेरिकेनेही मेक्सिकोमध्ये मोठी गुंतवणूक केली आहे आणि आता आपल्याला त्याची जबाबदारी घ्यावी लागेल आणि तिची स्थिती सुधारावी लागेल.” असे विधान त्यांनी केले होते. त्यांच्या याच विधानाचा मेक्सिकोच्या राष्ट्राध्यक्षांनी समाचार घेतला आहे.

ट्रम्प मेक्सिकोच्या आखाताचे नाव बदलू शकतात का? Mexican President on Trump। 

अमेरिका आणि मेक्सिको हे आंतरराष्ट्रीय जलविज्ञान संघटना (IHO) चे सदस्य देश आहेत. ही संस्था जगातील सर्व समुद्र आणि महासागरांचे सर्वेक्षण करते. ठिकाणांची नावे बदलण्याची जबाबदारी देखील IHO ची आहे. परंतु सामान्यतः, नाव बदलण्यासाठी दोन्ही पक्षांची संमती आवश्यक असते. पण जर ट्रम्प यांना हवे असेल तर ते त्यांच्या देशात मेक्सिकोच्या आखाताऐवजी अमेरिकाचे आखात हे नाव वापरण्यास सुरुवात करू शकतात. पण जागतिक पातळीवर हे करता येणार नाही.

डोनाल्ड ट्रम्प काय म्हणाले? Mexican President on Trump। 

मार-ए-लागोमध्ये पत्रकारांशी बोलताना डोनाल्ड ट्रम्प यांनी कॅनडा ते मेक्सिको, ग्रीनलँड ते पनामा अशा सर्व मुद्द्यांवर त्यांच्या योजनांबद्दल उघडपणे सांगितले. ट्रम्प यांनी कॅनडा आणि मेक्सिकोवर निर्बंध लादण्याचा आपला हेतू पुन्हा सांगितला, तर त्यांनी इस्रायली नागरिकांना ओलीस ठेवणाऱ्या हमासलाही कडक इशारा दिला. या काळात ट्रम्प यांनी पनामा कालवा आणि ग्रीनलँडवर लष्करी कारवाई करण्यास नकार दिला होता. त्यांनी सांगितले की, पनामा कालव्याबाबत सध्या त्यांच्यासोबत (पनामा) चर्चा सुरू आहे. तथापि, एपी वृत्तानुसार, ट्रम्प यांनी पनामा कालवा आणि ग्रीनलँडवर नियंत्रण मिळविण्यासाठी लष्करी बळाचा वापर करण्याची शक्यता नाकारलेली नाही. ट्रम्प म्हणाले की ते ग्रीनलँडऐवजी डेन्मार्कवर शुल्क लादण्याचा विचार करतील.