Mark Zuckerberg : मेटाचे मुख्य कार्यकारी अधिकारी मार्क झुकरबर्ग यांनी कंपनीच्या व्यापक पुनर्रचनेतील त्रुटी मान्य केल्या असून, नुकत्याच झालेल्या एका अंतर्गत बैठकीत, ‘एआय एजंट्स’ म्हणून ओळखल्या जाणाऱ्या स्वयंचलित प्रणालींची प्रगती त्यांच्या अपेक्षेप्रमाणे वेगाने झालेली नसल्याचे त्यांनी सांगितले.

कंपनीने केलेली मोठी नोकरकपात आणि अंतर्गत बदल जितके सुरळीत व्हायला हवे होते, तितके ते झाले नाहीत आणि वरिष्ठ अधिकाऱ्यांचा अंदाजाही चुकला, असा दावा एका विदेशी वृत्तसंस्थेने केला आहे.

कृत्रिम बुद्धिमत्तेच्या (एआय) पायाभूत सुविधांमध्ये मोठी गुंतवणूक करण्यासाठी मेटाने मे महिन्यात आपल्या जागतिक कर्मचारी वर्गापैकी तब्बल १०% कर्मचाऱ्यांना कामावरून कमी केले होते, तर ७,००० कर्मचाऱ्यांची नियुक्ती एआय-केंद्रित टीम्समध्ये केली होती. या बदलांमुळे कर्मचाऱ्यांमध्ये तीव्र नाराजी पसरली होती.

मार्क झुकरबर्ग यांनी स्पष्ट केले की, जानेवारी-फेब्रुवारीमध्ये जेव्हा पुनर्रचनेचे नियोजन सुरू होते, तेव्हा वरिष्ठ अधिकारी ‘अँथ्रोपिक’च्या ‘क्लॉड कोड’ सारख्या साधनांबद्दल अत्यंत आशावादी होते. मात्र, गेल्या चार महिन्यांत ‘एआय एजंट’ (वापरकर्त्याच्या वतीने स्वयंचलित कामे करणारी प्रणाली) विकासाची गती अपेक्षेप्रमाणे वाढलेली नाही आणि नवीन रचनेवर कंपनीने केलेली गुंतवणूकीला अद्याप यश मिळालेले नाही.

मेटा यावर्षी एआय पायाभूत सुविधांवर तब्बल १४५ अब्ज डॉलर्स खर्च करेल असा अंदाज आहे, जो जागतिक टेक क्षेत्रातील एकूण गुंतवणुकीचा मोठा हिस्सा आहे. या प्रचंड खर्चामुळे निर्माण झालेली कोंडी सुधारण्यासाठी मेटा आता आपल्या धोरणांमध्ये अंशतः बदल करत आहे. आगामी तीन ते सहा महिन्यांत या एआय गुंतवणुकीतून अधिक महत्त्वपूर्ण फायदे मिळण्यास सुरुवात होईल, अशी अपेक्षा झुकरबर्ग यांनी व्यक्त केली आहे. दरम्यान, मेटाच्या प्रवक्त्याने यावर अधिकृत भाष्य करण्यास नकार दिला.