Radhika Apte :  अभिनेत्री राधिका आपटे नेहमीच आपल्या स्पष्टवक्तेपणामुळे चर्चेत असते. तिच्या आगामी ‘अक्का’ या नेटफ्लिक्सवरील सीरिजदरम्यान राधिकाने केलेल्या विधानाने सर्वांचे लक्ष वेधून घेतलं आहे.

तिने चित्रपटाच्या सेटवर महिलांमध्ये वारंवार वाद होतात, ही समजूत फेटाळून लावली आहे. कामाच्या ठिकाणी महिलांमध्ये भांडणं होतात, हा विचार चुकीचा असल्याचे सांगतानाच तिने पुरुष महिलांपेक्षा अधिक असुरक्षित असतात, असेही म्हटले आहे.

‘अक्का’ या सीरिजमध्ये दोन खंबीर महिलांमधील संघर्ष दाखवण्यात आला आहे. यात राधिका अभिनेत्री कीर्ती सुरेशसह स्क्रीन शेअर करणार आहे. या सीरिजच्या सेटवरही या दोन अभिनेत्रींचे कॅमेऱ्यामागे वाद होत होते का, असा प्रश्न राधिका आपटेला विचारण्यात आला.

यावर उत्तर देताना राधिका आपटेने म्हटलं, “महिलांमध्ये वाद होतात, ही अतिशय जुनी आणि कालबाह्य विचारसरणी आहे. मला असं वाटतं की याबाबतीत महिलांपेक्षा पुरुष जास्त असुरक्षित असतात. हा विषय स्त्री आणि पुरुष असा नाही, तर एकमेकांशी असलेल्या मैत्रीपूर्ण संबंधांचा आहे. काही लोकांशी आपलं चांगलं जमतं, तर काही लोकांशी जमत नाही,” असं राधिका आपटेने स्पष्ट केलं.

महिलांपेक्षा पुरुष अधिक असुरक्षित

तिच्या मते, काही व्यक्तींशी आपले चांगले संबंध निर्माण होतात, तर काहींशी विचार जुळत नाहीत. हे स्त्री आणि पुरुष दोघांच्याही बाबतीत घडू शकते. महिलांपेक्षा पुरुष अधिक असुरक्षित असू शकतात. कामाच्या ठिकाणी महिलांमधील स्पर्धा आणि मतभेद यांनाच अधिक महत्त्व दिले जाते, मात्र पुरुषांच्या वर्तनाकडे आणि त्यांच्या असुरक्षिततेकडेही तितक्याच गांभीर्याने पाहणे गरजेचे आहे, असे तिने यावेळी सांगण्याचा प्रयत्न केला.

नेटफ्लिक्सच्या अधिकृत माहितीनुसार, ‘अक्का’ ही सीरिज महिलांचं राज्य असलेल्या एका साम्राज्याची कथा आहे. यात कीर्ती सुरेशने भवानीची, तर राधिका आपटेने रुद्राची भूमिका साकारली आहे. या सीरिजमध्ये तन्वी आझमी, महेश मांजरेकर, अंशुमन पुष्कर आणि मोनिका पनवार यांच्याही महत्त्वाच्या भूमिका आहेत. धर्मराज शेट्टी यांनी या सीरिजचं लेखन आणि दिग्दर्शन केलं असून, यशराज फिल्म्स एंटरटेनमेंटने तिची निर्मिती केली आहे.

हेही वाचा: 

King poster : ‘कातिल नहीं… आशिक हूं!’ शाहरुख खानच्या ‘किंग’चा फर्स्ट लूक रिलीज, हटके अंदाजाने चाहते घायाळ