बारामती : आपला माणूस काळाच्या पडद्याआड गेल्यावर पण, त्यांच्या आठवणी कधीच पुसल्या जात नाहीत. त्यांनी केलेली कामं, दिलेली प्रेरणा आणि माणसांशी जोडलेलं नातं कायम मनात घर करून राहतं. याच भावनेचा प्रत्यय बारामतीच्या सनसेट पॉईंटवर आला. दिवंगत उपमुख्यमंत्री अजितदादांच्या स्मृतींना उजाळा देण्यासाठी आयोजित करण्यात आलेल्या ‘एक पणती दादांसाठी… असंख्य आठवणी त्यांच्या कार्यासाठी…’ या उपक्रमाला बारामतीकरांनी अभूतपूर्व प्रतिसाद दिला. तब्बल दहा हजारांहून अधिक पणत्यांनी सनसेट पॉईंट उजळून निघाला आणि संपूर्ण परिसर अजितदादांच्या आठवणींनी भावूक झाला.

या भावपूर्ण उपक्रमाला महाराष्ट्र राज्याच्या उपमुख्यमंत्री सुनेत्रा पवार, युवा नेते जय पवार, अजितदादांच्या भगिनी विजया पाटील, ऋतुजा जय पवार यांच्यासह पवार कुटुंबीयांची उपस्थिती लाभली.
गेली अनेक वर्षे दिवाळी पाडव्याच्या दिवशी अजितदादा बारामतीकरांच्या भेटीसाठी सकाळपासून रात्री उशिरापर्यंत उपस्थित असायचे. सर्वसामान्य नागरिकांपासून कार्यकर्त्यांपर्यंत प्रत्येकाला वेळ देत त्यांच्या अडचणी समजून घेणे, बारामतीच्या विकासाचा ध्यास आणि नागरिकांच्या हिताला प्राधान्य देणे ही दादांची कार्यशैली होती. मात्र, यंदाचा पहिला दिवाळी पाडवा दादांशिवाय असल्याने त्यांच्या आठवणींना उजाळा देण्यासाठी या विशेष उपक्रमाचे आयोजन करण्यात आले होते.

कार्यक्रमातील सर्वांत भावस्पर्शी क्षण म्हणजे अजितदादांची साकारण्यात आलेली भव्य आणि आकर्षक रांगोळी. महेंद्र दीक्षित, भारत काळे, सिद्धार्थ कांबळे आणि वेदांत काळे यांनी आपल्या कलाकौशल्यातून अजितदादांचे सुंदर रांगोळीचित्र साकारले. या रांगोळीने उपस्थितांचे विशेष लक्ष वेधून घेतले.

यानंतर परिसरातील सर्व विद्युत रोषणाई बंद करण्यात आली. केवळ हजारो पणत्यांच्या प्रकाशात अजितदादांच्या आठवणींना उजाळा देण्यात आला. उपस्थित प्रत्येकाने आपल्या मोबाईलची बॅटरी टॉर्च सुरू करून दादांना अभिवादन केले. हजारो मोबाईल टॉर्च आणि पणत्यांच्या प्रकाशाने उजळलेला सनसेट पॉईंट हा क्षण उपस्थितांच्या मनावर कायमचा कोरला गेला.

यावेळी सादर झालेल्या ‘माझा आनंद हरवला’ या भावस्पर्शी गीताने उपस्थितांच्या भावनांना वाट मोकळी करून दिली. अनेकांच्या डोळ्यांत अश्रू तरळले. दादांसोबतच्या आठवणी, त्यांचा सहवास आणि त्यांनी बारामतीसाठी केलेले कार्य यांची आठवण काढताना संपूर्ण वातावरण भावुक झाले होते.

कार्यक्रम यशस्वी करण्यासाठी नगराध्यक्ष सचिन सातव, नगरसेवक अमर धुमाळ, अमोल कावळे, वैभव जगताप, समीर चव्हाण, नवनाथ बल्लाळ, प्रवीण माने, विशाल हिंगणे, अक्षय डांगे तसेच असंख्य दादाप्रेमी बारामतीकरांनी मोलाचे योगदान दिले.