Mehul Choksi Arrested । पंजाब नॅशनल बँकेतून हजारो कोटी रुपयांच्या फसवणुकीचा आरोपी मेहुल चोक्सीला बेल्जियममध्ये अटक करण्यात आली आहे. मेहुल चोक्सी स्वित्झर्लंडला पळून जाण्याच्या प्रयत्नात होता, परंतु भारतीय एजन्सींनी बेल्जियमच्या एजन्सींना याची माहिती दिली, त्यानंतर त्याला १२ एप्रिल रोजी अटक करण्यात आली असल्याची माहिती समोर आली आहे.

समोर आलेल्या माहितीनुसार, मेहुल चोक्सीने बेल्जियमच्या एजन्सींपासून आपले भारतीय आणि अँटिग्वा नागरिकत्व लपवले होते. त्याठिकाणावरूनही तो स्वित्झर्लंडला पळून जाण्याचा प्रयत्न करत होता. कर्करोगावर उपचार घेण्यासाठी तो बेल्जियमला ​​पोहोचला होता, असेही समोर आले आहे. भारतीय तपास संस्था सीबीआय आणि ईडी त्याच्या प्रत्येक हालचालीवर लक्ष ठेवून होत्या. मेहुल स्वित्झर्लंडला पळून जाण्याचा विचार करत असल्याचे उघडकीस येताच, भारतीय यंत्रणांनी बेल्जियमच्या तपास यंत्रणांना सतर्क केले आणि चोक्सीशी संबंधित सर्व कागदपत्रे आणि मुंबई न्यायालयाने जारी केलेले अटक वॉरंट कागदपत्रे शेअर केली. त्यानंतर चोक्सीला बेल्जियमच्या सुरक्षा एजन्सींनी पकडले.

मेहुल चोक्सीच्या प्रत्यार्पणात काय अडथळा? Mehul Choksi Arrested । 

बेल्जियममध्ये अटक झाल्यानंतर मेहुल चोक्सीने त्याच्या प्रकृतीचे कारण देत न्यायालयात जामीन मागितला आहे. त्यांच्या वतीने असे सांगण्यात आले की ते अँटिग्वा आणि बारबुडाहून बेल्जियमला ​​उपचारासाठी आले होते आणि त्यांच्या पत्नीसह अँटवर्पमध्ये राहत होते. पोलिसांनी त्याला येथे अटक केली. दरम्यान, भारतीय एजन्सी मेहुल चोक्सीचा जामीन आणि त्याचे प्रत्यार्पण रोखण्याच्या तयारीत व्यस्त आहेत. तथापि, चोक्सीच्या नागरिकत्वामुळे आणि वैद्यकीय स्थितीमुळे हे सोपे होणार नाही.

 मेहुल चोक्सीला अटक ही मोठी कामगिरी  

केंद्रीय अर्थ राज्यमंत्री पंकज चौधरी यांनी मेहुल चोक्सीच्या अटकेला मोठी कामगिरी म्हटले. एका वृत्तसंस्थेला दिलेल्या माहितीनुसार चौधरी यांनी देशाचे पैसे लुटणाऱ्या गुन्हेगारांना परत आणण्याच्या पंतप्रधानांच्या वचनबद्धतेचा पुनरुच्चार केला. ते म्हणाले, ‘पंतप्रधान नरेंद्र मोदी यांनी आधीच सांगितले आहे की गरिबांचे पैसे लुटणाऱ्यांना ते परत करावे लागतील आणि देशात अशा लोकांवर कारवाई केली जात आहे. मेहुल चोक्सीला अटक; हे निश्चितच एक मोठे यश आहे.” असे गौरवोद्गार काढले.

सरकारने मेहुलला लवकरात लवकर भारतात आणावे  

पीएनबी घोटाळ्याचे व्हिस्लब्लोअर हरिप्रसाद एसव्ही यांनी फरार मेहुल चोक्सीला अटक केल्याबद्दल सीबीआयचे कौतुक केले आहे. एएनआय या वृत्तसंस्थेशी बोलताना हरिप्रसाद यांनी, “ही केवळ देशासाठीच नाही तर चोक्सीने फसवलेल्या सर्वांसाठी एक चांगली बातमी असल्याचे म्हटले. त्यांनी सांगितले की “सरकारने मेहुल चोक्सीला लवकरात लवकर भारतात परत आणावे.”

 हरिप्रसाद यांच्याकडून पीएमओला पत्र    Mehul Choksi Arrested । 

हरिप्रसाद म्हणाले, ‘चोक्सीला परत आणण्याव्यतिरिक्त, सर्वात महत्त्वाचे म्हणजे त्याने भारतातून लुटलेले आणि जगात कुठेही लपवलेले अब्जावधी डॉलर्स परत आणणे. यावेळी भारत सरकार यशस्वी होईल अशी आशा आहे. ही खूप चांगली बातमी आहे. २६ जुलै २०१६ रोजी बेंगळुरूचे उद्योजक हरी प्रसाद यांनी पंतप्रधान कार्यालयाला (पीएमओ) पत्र लिहून मोठ्या प्रमाणात घोटाळा होण्याची भीती व्यक्त केली होती. त्यांच्या पत्रात, प्रसाद यांनी म्हटले होते की बॅलन्स शीटमध्ये काहीतरी चूक असल्याचे स्पष्ट संकेत आहेत.

मेहुल चोक्सीवर कोणते आरोप आहेत?

पंजाब नॅशनल बँकेला १३,८५० कोटी रुपयांचा घोटाळा केल्याच्या आरोपाखाली मेहुल चोक्सीवर सीबीआय आणि ईडीकडून खटला सुरू आहे. चोक्सीचा पुतण्या नीरव मोदी हा देखील या प्रकरणात सह-आरोपी आहे, जो लंडनमध्ये लपून बसला आहे. मेहुल चोक्सी आणि नीरव मोदी जानेवारी २०१८ मध्येच भारतातून पळून गेले होते. पीएनबी घोटाळा उघडकीस येण्यापूर्वीच आणि चोक्सीने अँटिग्वाचे नागरिकत्व घेण्यापूर्वीच हे दोघेही भारत सोडून गेले होते. २०२१ मध्ये, क्युबाला जात असताना त्याला डोमिनिका येथे अटक करण्यात आली होती, परंतु ५१ दिवस तुरुंगात घालवल्यानंतर, ब्रिटिश राणीच्या प्रिव्ही कौन्सिलने त्याला सूट दिली. मेहुल चोक्सीच्या कंपनीचे नाव गीतांजली जेम्स लिमिटेड होते.