Medha Manjrekar:  मराठी चित्रपटसृष्टीतील अभिनेत्री मेधा मांजरेकर यांनी त्यांच्या आयुष्यातील अत्यंत कठीण काळाबद्दल पहिल्यांदाच मनमोकळेपणाने सांगितले आहे. प्रसिद्ध अभिनेते आणि दिग्दर्शक महेश मांजरेकर यांच्या पत्नी असलेल्या मेधा यांनी सोशल मीडियावर एक भावनिक पोस्ट शेअर करत त्यांना कर्करोगाचे निदान झाल्याची माहिती दिली. तसेच शस्त्रक्रिया, केमोथेरपी आणि रेडिएशनसारख्या उपचारांचा कठीण प्रवास त्यांनी कसा पार केला, याबद्दलही त्यांनी चाहत्यांसोबत अनुभव शेअर केला.

मेधा मांजरेकर यांनी इन्स्टाग्रामवर लिहिलेल्या पोस्टमध्ये सांगितले की, आयुष्यात काही प्रवास असे असतात जे माणसाला कायमचे बदलून टाकतात. त्यांच्यासाठी कर्करोगाशी झालेली लढाई हा तसाच एक प्रवास होता. आता त्यांच्या उपचारांचा पहिला टप्पा पूर्ण होत आला असून वाढदिवसाच्या निमित्ताने त्यांनी या संपूर्ण प्रवासाकडे मागे वळून पाहत आपल्या भावना व्यक्त केल्या.

त्या म्हणाल्या की, कर्करोगाचे निदान झाल्यानंतर शस्त्रक्रिया, केमोथेरपी आणि रेडिएशन हे उपचार निश्चितच कठीण होते. मात्र या सर्वांपेक्षा जास्त लक्षात राहिलं ते म्हणजे लोकांकडून मिळालेलं प्रेम, आधार आणि आशीर्वाद. जेव्हा जेव्हा त्यांना पुढे चालणं कठीण वाटलं, तेव्हा कुणीतरी मदतीचा हात पुढे केला. त्यामुळे हा प्रवास त्यांनी कधीच एकट्याने केला नाही, अशी भावना त्यांनी व्यक्त केली.

मेधा यांनी आपल्या पोस्टमध्ये डॉक्टर, परिचारिका, गुरु, कुटुंबीय, मित्र-मैत्रिणी आणि विशेषतः पती महेश मांजरेकर यांचे मनापासून आभार मानले. त्यांच्या भक्कम पाठिंब्यामुळेच हा कठीण काळ पार करता आला, असे त्यांनी सांगितले. संकटाच्या काळात कुटुंबाची साथ किती महत्त्वाची असते, याची जाणीव या अनुभवातून अधिक झाली, असेही त्यांनी नमूद केले.

याचबरोबर त्यांनी आपल्या मुलांबद्दलही भावनिक शब्दांत भावना व्यक्त केल्या. त्या म्हणाल्या की, आयुष्यात असा एक टप्पा येतो, जेव्हा मुलं मोठी होतात आणि आईचा हात नकळत सुटतो. पण त्यांच्या बाबतीत तसं घडलं नाही. उलट या कठीण काळात मुलांनी त्यांचा हात अधिक घट्ट धरून ठेवला. त्यांच्या प्रेमामुळे आणि धीरामुळे संकटाचा सामना करण्याची ताकद मिळाली.

मेधा मांजरेकर यांनी आपल्या पोस्टमध्ये त्या सर्व “अदृश्य हातांचे”ही आभार मानले, ज्यांनी प्रत्यक्ष किंवा अप्रत्यक्षपणे त्यांना साथ दिली. अनेकांनी त्यांच्यासाठी प्रार्थना केली, धीर दिला आणि सतत सकारात्मक ऊर्जा दिली. या सर्व प्रेमामुळे आणि आपुलकीमुळेच त्या आज उपचारांचा महत्त्वाचा टप्पा पूर्ण करू शकल्या, असे त्यांनी म्हटले.

त्यांच्या या भावनिक पोस्टनंतर चाहत्यांनी आणि मराठी चित्रपटसृष्टीतील अनेक कलाकारांनी त्यांना शुभेच्छा दिल्या आहेत. लवकर पूर्णपणे बऱ्या व्हाव्यात आणि पुन्हा नव्या उत्साहाने कामाला सुरुवात करावी, अशा शुभेच्छांचा वर्षाव सोशल मीडियावर होत आहे.

मेधा मांजरेकर यांनी आपल्या अनुभवातून एक महत्त्वाचा संदेशही दिला आहे. कोणतेही संकट आले तरी ते एकट्याने पेलण्याची गरज नसते. कुटुंब, मित्र आणि आपल्यावर प्रेम करणारी माणसं सोबत असतील तर कितीही मोठ्या अडचणींवर मात करता येते. त्यांच्या या पोस्टने अनेकांना धैर्य, आशा आणि सकारात्मकतेची नवी प्रेरणा दिली आहे.