15 ऑगस्ट स्वातंत्र्यदिनाच्या दिवशी मटण विक्रीवर बंदी घालण्याचा निर्णय राज्यातील काही महापालिकांनी घेतल्याने वाद निर्माण झाला आहे. या निर्णयाला विरोधकांनी तीव्र विरोध दर्शवला असून, राज्यातील राजकीय वातावरण तापले आहे. विरोधकांनी सरकारवर जोरदार टीका करत हा निर्णय मागे घेण्याची मागणी केली आहे.

राष्ट्रवादी काँग्रेस (शरद पवार गट) चे आमदार जितेंद्र आव्हाड आणि शिवसेना (उद्धव ठाकरे गट) चे खासदार संजय राऊत यांनी या निर्णयावरून सरकारवर हल्लाबोल केला आहे. दुसरीकडे, मनसे प्रमुख राज ठाकरे यांनीही यावर तीव्र नाराजी व्यक्त केली आहे. “स्वातंत्र्यदिनी लोकांच्या खाण्यावर बंदी घालून नक्की कोणता स्वातंत्र्यदिन साजरा केला जात आहे?” असा थेट सवाल ठाकरे यांनी उपस्थित केला. कोणी काय खावे, याचा निर्णय सरकार किंवा महापालिकांनी घेऊ नये, असेही त्यांनी स्पष्ट केले.

15 अगस्त को सभी मीट और चिकन की दुकानें बंद रखने का तुगलकी फरमान जारी करने वाले सभी नगर निगम आयुक्तों को 15 अगस्त को दोपहर 1 बजे मेरे आवास पर आयोजित चिकन बिरयानी और मटन कोरमा पार्टी में शामिल होने का निमंत्रण। महाराष्ट्र के मुख्यमंत्री श्री @Dev_Fadnavis भी इस अवसर पर उपस्थित… pic.twitter.com/kFQ8etEFgf

— Imtiaz Jaleel (@imtiaz_jaleel) August 14, 2025

 

यावर सरकारची भूमिका स्पष्ट करताना मुख्यमंत्री देवेंद्र फडणवीस यांनी हा निर्णय त्यांच्या सरकारचा नसून, तो तत्कालीन काँग्रेस सरकारच्या काळात घेतला गेला होता, असे सांगितले. दरम्यान, छत्रपती संभाजीनगर महापालिकेनेही स्वातंत्र्यदिनी मांस विक्री बंदीचे आदेश जारी केले आहेत. यावर माजी खासदार इम्तियाज जलील यांनी आक्रमक पवित्रा घेतला आहे.

जलील यांनी ट्विटरवरून तीव्र प्रतिक्रिया देताना म्हटले, “उद्या दुपारी 1 वाजता माझ्या निवासस्थानी मटण पार्टी आयोजित केली आहे. ज्या महापालिका आयुक्तांनी मांस विक्री बंदीचे फरमान काढले, त्या सर्वांना आणि मुख्यमंत्री देवेंद्र फडणवीस यांना मी या पार्टीचे निमंत्रण देत आहे. ही पार्टी त्यांना स्वातंत्र्याचा खरा अर्थ समजावून देण्यासाठी आहे.” या निर्णयावरून सुरू असलेल्या वादाने स्वातंत्र्यदिनापूर्वीच राज्यातील राजकीय वातावरण ढवळून निघाले आहे.