MD Drugs Seized – पुणे शहर पोलिसांनी अंमली पदार्थविरोधी मोहिमेत मोठे यश मिळवत राजस्थानपर्यंत कारवाई करून मेफेड्रॉन (एमडी) तस्करी करणारी आंतरराज्यीय टोळी उद्ध्वस्त केली. पोलिसांनी १ किलो ९६० ग्रॅम एमडी जप्त करून सहा आरोपींना अटक केली. त्यांच्याकडून एकूण ४ कोटी २७ लाख ०९ हजारांचा मुद्देमाल हस्तगत केला आहे. पोलीस उपायुक्त (परिमंडळ ४) सोमय मुंडे यांनी सांगितले, की पहाटे खराडी येथील ईऑन फेज-२ मागील गेटजवळ गस्तीदरम्यान पोलिसांनी पांढऱ्या स्वीफ्ट कारमधील दोन संशयितांना ताब्यात घेतले. त्यांच्या जवळून २७ ग्रॅम मेफेड्रॉन व साहित्य जप्त करण्यात आले. याप्रकरणी खराडी पोलीस ठाण्यात एनडीपीएस कायद्यान्वये गुन्हा दाखल करण्यात आला. अटक आरोपी मोतीसिंह श्रवणसिंह राजपुरोहित व हरीश सुजना रामदेवासी हे मूळ राजस्थानचे असून, वर्षभरापासून पुण्यात एमडी विक्री करीत असल्याचे तपासात निष्पन्न झाले. वरिष्ठ पोलीस निरीक्षक संजय चव्हाण यांच्या मार्गदर्शनाखाली सहायक पोलीस निरीक्षक रवींद्र गोडसे व पोलीस उपनिरीक्षक राहुल कोळपे यांच्या पथकाने तांत्रिक तपास सुरू केला. त्यांनी ७ फेब्रुवारी रोजी वाघोली परिसरात सापळा रचून योगेश ऊर्फ मनीष बाबूराम बिष्णोई याला अटक करून त्याच्याकडून १५१ ग्रॅम एमडी (३० लाख २० हजार) जप्त करण्यात आले. पुढील कारवाईत सचिन ऊर्फ एस .के. रमेशकुमार बिष्णोई याच्याकडून ४ लाख ६५ हजार रोख व मोबाइल जप्त केला. त्यानंतर मांजरी बुद्रुक येथे अमित सुनील घुले याला ताब्यात घेऊन त्याच्याकडून ३९८ ग्रॅम एमडी, फॉर्च्युनर वाहन व मोबाइल असा सुमारे १ कोटी दोन लाखांचा मुद्देमाल जप्त केला. तपासाचा मुख्य धागा राजस्थानपर्यंत पोहोचल्याने विशेष पथके रवाना करण्यात आली. बालोतरा येथे मुख्य पुरवठादार रतनलाल किश्णाराम जाठ याला अटक करून त्याच्याकडून १३८४ ग्रॅम एमडी (२ कोटी ७६ लाख) जप्त करण्यात आले. फरार आरोपी रामकरण जाट ऊर्फ चौधरी ऊर्फ सियाग यालाही ताब्यात घेतले. या संपूर्ण कारवाईत पोलिसांनी एकूण १ किलो ९६० ग्रॅम एमडी, रोख रक्कम, मोबाइल फोन व वाहन असा ४ कोटी २७ लाख ९ हजार रुपये किमतीचा मुद्देमाल जप्त करत सहा आरोपींना अटक केली. ही कारवाई पोलीस आयुक्त अमितेश कुमार, सहआयुक्त रंजनकुमार शर्मा, अपर आयुक्त मनोजकुमार पाटील, पोलीस उप आयुक्त सोमय मुंडे, पोलीस उपआयुक्त (गुन्हे) निखील पिंगळे व सहाय्यक आयुक्त प्रांजली सोनावणे यांच्या मार्गदर्शनाखाली पार पडली.
