Mayank Yadav Bowling : मयंक यादवच्या वेगाची दहशत! अवघ्या १२ धावांत घेतले ४ विकेट्स, एकाच षटकात उडवली ३ फलंदाजांची दाणादाण
Mayank Yadav Bowling : सय्यद मुश्ताक अली ट्रॉफीच्या 'ब' गटाच्या सामन्यात दिल्लीने पंजाबचा १०९ धावांनी पराभव केला. मयंक यादवने अवघ्या १२ धावांत ४ विकेट्स घेतले.

Mayank Yadav 4 Wickets Syed Mushtaq Ali Trophy Delhi Beats Punjab By 109 Runs : सय्यद मुश्ताक अली ट्रॉफीमध्ये दिल्लीचा वेगवान गोलंदाज मयंक यादवने आपल्या भेदक गोलंदाजीने पंजाबच्या फलंदाजांची दाणादाण उडवली आहे. होळकर स्टेडियमवर खेळल्या गेलेल्या सामन्यात मयंकने अवघ्या १२ धावांत ४ विकेट्स घेत दिल्लीला तब्बल १०९ धावांनी दणदणीत विजय मिळवून दिला. विशेष म्हणजे, मयंकने आपल्या पहिल्याच षटकात एकही धाव न देता पंजाबचे तीन फलंदाज बाद करत सामन्याचे चित्र पूर्णपणे पालटून टाकले.
पहिल्याच षटकात तीन विकेट्स; मयंकच्या वेगापुढे पंजाबचा संघ पत्त्यासारखा कोसळला
प्रत्त्युत्तरात २४१ धावांच्या मोठ्या लक्ष्याचा पाठलाग करणाऱ्या पंजाबविरुद्ध चौथ्या षटकात मयंकला गोलंदाजीसाठी पाचारण करण्यात आले. त्याने पहिल्याच चेंडूवर विहान मल्होत्राला (२३) बाद केले, तर तिसऱ्या चेंडूवर उदय सहारन (०) आणि पाचव्या चेंडूवर अर्जुन राजपूतला (०) माघारी धाडले. मयंकच्या या निर्धाव षटकामुळे पंजाबचा संघ पूर्णपणे दबावाखाली आला; दहाव्या षटकापर्यंत ६ बाद अशी अवस्था झाल्यानंतर संपूर्ण संघ १३१ धावांत गारद झाला.
यश धुल आणि कर्णधार प्रियांश आर्याची फटकेबाजी; दिल्लीचा २४० धावांचा डोंगर
Mayank yadav have 8 wickets in Last 19 balls he bowled in SMAT https://t.co/S4gko8XsO8
— Sawai96 (@Aspirant_9457) November 16, 2026
तत्पूर्वी, प्रथम फलंदाजी करताना दिल्लीच्या फलंदाजांनी पंजाबच्या गोलंदाजांचा चांगलाच समाचार घेतला. कर्णधार प्रियांश आर्याने ३२ चेंडूंत ४ चौकार आणि ३ षटकारांसह ५५ धावा कुटल्या, तर सार्थक रंजनने १४ चेंडूंत २५ धावांचे योगदान दिले. त्यानंतर यश धुलने अवघ्या ४० चेंडूंत ७ चौकार आणि ५ उत्तुंग षटकारांसह नाबाद ७८ धावांची झंझावाती खेळी करत धावसंख्येला वेग दिला.
नितीश राणाच्या स्फोटक खेळीने गाठला २४० धावांचा टप्पा; पंजाबवर दारुण पराभव
यश धुलला मधल्या फळीत अनुभवी फलंदाज नितीश राणाने उत्तम साथ देत अवघ्या २० चेंडूंत ३५ धावांची स्फोटक खेळी साकारली. दिल्लीच्या या सामूहिक आक्रमक फलंदाजीमुळे संघाने निर्धारित २० षटकांत २४० धावांचा भलामोठा डोंगर उभारला. या विशाल धावसंख्येच्या दबावाखाली पंजाबची फलंदाजी पूर्णपणे कोलमडली आणि दिल्लीने १०९ धावांनी एकतर्फी विजय नोंदवत स्पर्धेत आपले वर्चस्व सिद्ध केले.





