Maval News – मावळ तालुका सहकारी खरेदी-विक्री संघाच्या नेतृत्वात मोठी घडामोड घडली आहे. सभापती शिवाजी असवले आणि उपसभापती अमोल भोईरकर यांनी आपल्या पदांचे राजीनामे दिले आहेत. शनिवारी (दि. २१) झालेल्या संघाच्या सभेत दोन्ही पदाधिकाऱ्यांनी अधिकृतपणे राजीनामे सादर केले. या निर्णयामुळे संघातील पुढील नेतृत्वाबाबत चर्चांना उधाण आले असून आता या महत्त्वाच्या पदांवर कोणाची निवड होते, याकडे तालुक्याचे लक्ष लागले आहे. मार्च २०२४ मध्ये मावळ तालुका सहकारी खरेदी-विक्री संघाची निवडणूक पार पडली होती. त्यावेळी सभापतीपदी शिवाजी असवले आणि उपसभापतीपदी अमोल भोईरकर यांची बिनविरोध निवड झाली होती. निवडीनंतर संघातील सर्व सदस्यांना कामाची समान संधी मिळावी या उद्देशाने पदांचा कार्यकाळ वाटून घेण्याचा निर्णय घेण्यात आला होता. ठरलेल्या कालावधीनंतर जाणीव ठेवत पदांचा राजीनामा देण्याचे नियोजन करण्यात आले होते. दरम्यान, राज्याच्या राजकारणात झालेल्या बदलांचा परिणाम स्थानिक सहकार क्षेत्रावरही झाला. विधानसभेच्या निवडणुकीच्या पार्श्वभूमीवर राष्ट्रवादी काँग्रेस पक्षात पडलेल्या फुटीमुळे स्थानिक पातळीवरील समीकरणे बदलली. पक्षातील मोठा गट बाहेर पडल्याने संघातील पदांच्या फेरबदलाचे ठरलेले वेळापत्रक प्रभावीपणे राबवता आले नाही. परिणामी अनेक इच्छुक सदस्यांची संधी पुढे ढकलली गेली. अशा परिस्थितीत शनिवारी झालेल्या सभेत सभापती आणि उपसभापती यांनी राजीनामे दिल्याने नेतृत्वबदलाची प्रक्रिया सुरू झाली आहे. या निर्णयामुळे संघातील इच्छुक सदस्यांच्या आशा पुन्हा जागृत झाल्या आहेत. तालुक्यातील सहकार क्षेत्र हे राजकीय दृष्ट्या महत्त्वाचे मानले जाते. खरेदी-विक्री संघाचा शेतकरी आणि व्यापारी वर्गाशी थेट संबंध असल्याने त्याच्या नेतृत्वातील बदलाला विशेष महत्त्व प्राप्त होते. तालुक्याचे आमदार सुनील शेळके, सहकार क्षेत्रातील ज्येष्ठ नेतृत्व माऊली दाभाडे, सहकार भूषण भेगडे तसेच राष्ट्रवादी काँग्रेसचे तालुकाध्यक्ष गणेश खांडगे यांच्या भूमिकेतून पुढील उमेदवार निश्चित होण्याची शक्यता वर्तवली जात आहे. संघातील सत्तासमीकरणे, राजकीय पाठबळ आणि सहकार क्षेत्रातील समन्वय या घटकांचा विचार करूनच नव्या सभापती व उपसभापतीची निवड होणार असल्याचे संकेत मिळत आहेत. या पार्श्वभूमीवर तालुक्यातील राजकीय आणि सहकारी वर्तुळात मोठी उत्सुकता निर्माण झाली आहे. राजीनाम्यानंतरची औपचारिक प्रक्रिया, निवडणुकीचे वेळापत्रक आणि उमेदवारांची अंतिम निवड या सर्व बाबी स्पष्ट झाल्यानंतरच संघाच्या नेतृत्वाचे पुढील चित्र स्पष्ट होणार आहे. युवा नेतृत्वाला संधी नेतृत्वबदलाच्या निमित्ताने संघात नव्या आणि युवा नेतृत्वाला संधी मिळण्याची शक्यता व्यक्त केली जात आहे. गेल्या काही वर्षांत राजकारणासह सहकार क्षेत्रात देखील तरुण कार्यकर्त्यांचा सहभाग वाढला आहे, त्यामुळे त्यांना नेतृत्वपद देण्याबाबत काही सदस्य सकारात्मक असल्याचे बोलले जात आहे.
