प्रभात वृत्तसेवा
माथेरान – यंदाच्या हंगामी पावसाळ्यात तब्बल ५९५० मिमी (२३४.३ इंच) इतकी पर्जन्यवृष्टी नोंदली गेली आहे. ही पावसाची मात्रा गेल्या वर्षीच्या ५९२७ मिमी पावसापेक्षा २३ मिमीने अधिक आहे. सलग दुसऱ्या वर्षी माथेरानने सहा हजार मिलिमीटरच्या जवळपास पाऊस अनुभवला आहे. त्यामुळे माथेरान शहर पुन्हा एकदा पावसाचे शहर म्हणून नावारूपास आले आहे.तपशीलानुसार, १ जून ते ३० सप्टेंबर २०२५ या चार महिन्यांच्या हंगामी कालावधीत हा पाऊस झाला. महिन्यांनुसार जूनमध्ये १२१०.४० मिमी, जुलैमध्ये १८२६.४० मिमी, ऑगस्टमध्ये १७४२.८० मिमी आणि सप्टेंबरमध्ये ११७०.४० मिमी पाऊस झाला.

यापैकी जुलै आणि ऑगस्ट हे सर्वाधिक पावसाचे महिने ठरले आहेत.हंगामापूर्वी मे महिन्यातच माथेरानमध्ये ५७५.२० मिमी इतका पाऊस झाला होता, परंतु ही नोंद हंगामी पावसात समाविष्ट केलेली नाही. पावसाळ्याची सुरुवात १ जून रोजी १०.२० मिमी पावसाने झाली, तर समाप्ती ३० सप्टेंबर रोजी १९.६० मिमी पावसाने झाली.

चार महिन्यांत पावसाने पार केलेले टप्पे..
२५ जूनला एक हजार मिमी, १३ जुलैला दोन हजार मिमी, ३० जुलैला तीन हजार मिमी, २० ऑगस्टला चार हजार मिमी आणि ६ सप्टेंबरला पाच हजार मिमी असा टप्पा पावसाने गाठला आहे. दरम्यान २० ऑगस्ट २०२५ रोजी एका दिवसात तब्बल ४३८.४० मिमी पर्जन्यवृष्टी झाली, जी यंदाच्या वर्षातील सर्वाधिक दैनंदिन नोंद ठरली. मागील दोन वर्षांची (२०२४ व २०२५) सरासरी पर्जन्यमानाची गणना करता ती ५९३८.५० मिमी इतकी आहे.

यावरून माथेरानमध्ये पर्जन्यवृष्टी सातत्याने वाढत असल्याचे दिसून येते.निसर्गसंपन्न माथेरानमध्ये वाढणारा पाऊस हा पर्यावरणीय संतुलनाचे उत्तम उदाहरण मानले जात आहे. सततच्या पावसामुळे माथेरानची हिरवळ अधिक खुलली असून, पावसाळ्यातील सुंदर धबधबे, दाट जंगल आणि निसर्गरम्य वातावरणामुळे हे ठिकाण पर्यटकांचे आवडते ठिकाण ठरले आहे.