Match Fixing : आयसीसी T20 विश्वचषक 2026 नुकताच संपला असून, भारताने न्यूझीलंडला पराभूत करून दणदणीत जेतेपद पटकावले आहे. या उत्साहपूर्ण विजयानंतर आता क्रिकेटप्रेमींचे लक्ष आयपीएल 2026 (Match Fixing) कडे वळले आहे. जगभरात या १९व्या हंगामाची चर्चा जोरात सुरू आहे. विशेष म्हणजे स्पर्धेच्या पहिल्या १५ दिवसांचे वेळापत्रक जाहीर झाले असून, २८ मार्च २०२६ पासून सामने सुरू होणार आहेत आणि १२ एप्रिलपर्यंत हे प्राथमिक टप्प्यातील सामने खेळवले जातील. मात्र, याच वेळी क्रिकेट जगताला हादरवणारी एक मोठी बातमी समोर आली आहे. मॅच फिक्सिंग (Match Fixing) आणि भ्रष्टाचाराच्या गंभीर आरोपांखाली वेस्ट इंडिजचा माजी फास्ट-बॉलिंग ऑलराउंडर जेवॉन सियर्ल्स (Javon Searles) दोषी ठरला असून, आंतरराष्ट्रीय क्रिकेट परिषद (ICC) ने त्याच्यावर तात्काळ आणि कठोर कारवाई केली आहे. त्याच्यासोबत त्याच्या संघातील दोन अधिकाऱ्यांनाही निलंबित करण्यात आले आहे. काय आहे नेमके प्रकरण? हे प्रकरण मुख्यतः (Bim10 लीग) शी संबंधित आहे. ही T10 स्पर्धा बार्बाडोस येथे आयोजित करण्यात आली होती आणि ती क्रिकेट वेस्ट इंडिज (CWI) च्या अँटी-करप्शन कोड अंतर्गत येते. जेवॉन सियर्ल्स Titans संघात खेळत होता. ICC आणि CWI ने संयुक्तपणे जेवॉन सियर्ल्स, Titans संघाचे मालक चित्रांजन राठोड (Chitranjan Rathod) आणि संघ अधिकाऱी ट्रेवॉन ग्रिफिथ (Trevon Griffith) यांच्यावर अनेक गंभीर आरोप ठेवले आहेत. नेमके आरोप काय आहेत? Article 2.1.1 चे उल्लंघन: Bim10 स्पर्धेतील सामन्यांचा निकाल, प्रगती, वर्तन किंवा इतर पैलूंवर अनुचित प्रभाव टाकणे, फिक्सिंग करणे किंवा प्रयत्न करणे अनधिकृत दृष्टिकोन नोंदवणे किंवा अहवाल न देणे. भ्रष्टाचाराशी संबंधित प्रकरणात चौकशीत सहकार्य न करणे, महत्त्वाची माहिती लपवणे किंवा अडथळा निर्माण करणे. जेवॉन सियर्ल्सवर CWI कोड अंतर्गत चार आरोप आहेत, तर राठोडवर तीन आणि ग्रिफिथवर CWI अंतर्गत चार तसेच ICC अंतर्गत एक आरोप आहे. कारवाई आणि सद्यस्थिती जेवॉन सियर्ल्स, चित्रांजन राठोड आणि ट्रेवॉन ग्रिफिथ यांना सर्व प्रकारच्या क्रिकेट मधून प्रोव्हिजनल सस्पेंशन (निलंबन) देण्यात आले आहे. ते कोणत्याही क्रिकेट-संबंधित क्रियाकलापांमध्ये भाग घेऊ शकत नाहीत. त्यांना ११ मार्च २०२६ पासून १४ दिवसांच्या आत आरोपांना उत्तर देण्याची मुदत देण्यात आली आहे. ICC ने स्पष्ट केले आहे की, अनुशासनात्मक प्रक्रिया सुरू असताना अधिक टिप्पणी केली जाणार नाही. जेवॉन सियर्ल्सची क्रिकेट कारकीर्द जेवॉन सियर्ल्स ३९ वर्षांचा फास्ट-बॉलिंग ऑलराउंडर आहे. त्याने वेस्ट इंडिजसाठी खेळले असून, Caribbean Premier League मध्ये Trinbago Knight Riders साठी खेळला आहे. विशेष म्हणजे IPL 2018 मध्ये तो कोलकाता नाईट रायडर्स (KKR) कडून खेळला होता. त्याने KKR साठी ४ सामने खेळले आणि २ विकेट्स घेतल्या. त्याची इकॉनॉमी रेट १२.७१ इतकी होती. आयपीएल २०२६च्या पूर्वसंध्येला ही बातमी आल्याने क्रिकेटप्रेमींमध्ये मोठी खळबळ उडाली आहे. ICC ने भ्रष्टाचाराविरुद्ध जीरो टॉलरन्स धोरण अवलंबले असून, अशा प्रकरणांमध्ये कठोर कारवाई करत आहे.
