करंदी, (ता. शिरूर): शिक्रापूर-चाकण रस्त्यावरील भारत गॅस फाटा येथे मंगळवारी (दि. 29 एप्रिल) दुपारी एका टायरच्या दुकानाला लागलेल्या आगीने रौद्ररूप धारण केले. आगीने शेजारील दुकानांना विळखा घातल्याने गॅस सिलेंडरचे स्फोट होऊन चार दुकाने जळून खाक झाली. या घटनेत लाखो रुपयांचे नुकसान झाले असून, परिसरात दहशतीचे वातावरण पसरले.

दुपारच्या सुमारास टायरच्या दुकानाला अचानक आग लागली. स्थानिक नागरिकांनी टायर आणि एक दुचाकी बाहेर काढून आग विझवण्याचा प्रयत्न केला. मात्र, आग शेजारील गॅसच्या दुकानात पसरल्याने सिलेंडरचे स्फोट सुरू झाले. यामुळे आगीने टायर दुकानासह एक गॅरेज, चहाचे हॉटेल आणि गॅस सिलेंडरचे दुकान यांना वेढले. धुराचे लोळ आणि आगीचे भडके वाढल्याने नागरिकांमध्ये घबराट पसरली.

अग्निशामक दल आणि स्थानिकांचे शर्थीचे प्रयत्न –
घटनेची माहिती मिळताच चाकण नगरपरिषद, पुणे महानगर प्रादेशिक परिवहन आणि रांजणगाव औद्योगिक वसाहतीच्या अग्निशामक दलाचे तीन पथके घटनास्थळी दाखल झाले. त्यांनी सुमारे एक तास अथक प्रयत्न करून आगीवर नियंत्रण मिळवले.

यावेळी करंदीच्या पोलीस पाटील वंदना साबळे, माजी उपसरपंच पांडुरंग ढोकले, पिंपळे जगतापच्या पोलीस पाटील वर्षा थिटे, पोलीस कर्मचारी प्रताप कांबळे, सागर वर्पे, अविनाश तांबे, आपदा मित्र महेश साबळे पाटील, भाजपाचे उपाध्यक्ष अशोक शेळके, भरत ढोकले, माऊली ढोकले, सुदाम ढोकले आणि प्रदीप ढोकले यांनी अग्निशामक जवानांना मदत केली.

लाखोंचे नुकसान, दुकाने उद्ध्वस्त –
या आगीत टायर दुकानातील 50 हून अधिक टायर, गॅस सिलेंडरचे दुकान, प्रेमाचा चहा हॉटेल आणि एक गॅरेज पूर्णपणे जळून खाक झाले. आग लागताच बाजूला काढलेले काही टायर आणि एक दुचाकीही जळून नष्ट झाली. या घटनेमुळे लाखो रुपयांचे नुकसान झाले आहे.

परिसरात तणाव, चौकशी सुरू –
आगीमुळे परिसरातील नागरिकांमध्ये भीतीचे वातावरण आहे. आगीचे नेमके कारण अद्याप स्पष्ट झाले नसून, पोलीस आणि अग्निशामक दल याबाबत चौकशी करत आहे. स्थानिकांनी या घटनेतून धडा घेऊन सुरक्षिततेच्या उपाययोजना कठोर करण्याची मागणी केली आहे.