Pakistan – पाकिस्तानातील बलुचिस्तान प्रांतात एका कोळशाच्या खाणीत मिथेन गॅसचा स्फोट झाल्यामुळे किमान ३४ जण ठार झाले आणि डझनभर जखमी झाले आहेत. ही घटना गुरुवारी क्वेटाजवळील सोरेंज कोळसा क्षेत्रात घडली.

शिफ्ट बदलण्याच्या वेळी कोळशाच्या खाणीत गॅसचा स्फोट झाला, त्यामुळे शेजारच्या खाणीचेही नुकसान झाले आणि ५० हून अधिक कामगार खाणीतच अडकले.

जमिनीखाली सुमारे ४ हजार फूट खोलवर झालेला स्फोट आणि त्यानंतर लागलेल्या आगीत हे , खाण कामगार
सापडले. या स्फोटामुळे इमारती कोसळल्या, त्यात अनेक कामगार जागीच ठार झाले आणि इतर जळत्या ढिगाऱ्याखाली अडकले.

बचाव पथकांनी आज सकाळपर्यंत ३४ मृतदेह बाहेर काढले असून अडकलेल्या २२ कामगारांची सुटका केली आहे, असे प्रांतीय आपत्ती व्यवस्थापन प्राधिकरणाने म्हटले आहे.

ज्या खाणीत स्फोट झाला, तिथे सुरुवातीला २२ कामगार अडकले होते, तर उर्वरित कामगार शेजारच्या खाणीत अडकले होते, असे खाणींचे मुख्य निरीक्षक मुहम्मद आतिफ यांनी म्हटले आहे. तर ऑल पाकिस्तान कोल मायनर्स असोसिएशनचे पीर मुहम्मद काकर यांनी या दुर्घटनेच्या वृत्ताला दुजोरा दिला आहे.

बचाव पथके अत्यंत कठीण परिस्थितीत काम करत आहेत. सुरू असलेल्या बचाव कार्यात प्रांतीय सरकार सर्वतोपरी प्रयत्न करेल, असे आश्वासन बलुचिस्तानचे खाण आणि खनिज मंत्री शोएब नौशेरवानी यांनी दिले. दुर्घटनेतील मृतांना सरकारकडून प्रत्येकी ५ लाख रुपयांची भरपाई देण्याची घोषणाही त्यांनी केली.

तसेच या घटनेची सखोल चौकशी करण्यात येईल आणि भविष्यात अशा दुर्घटना घडू नयेत, यासाठी खाणींमधील सुरक्षेच्या उपाययोजनांचा आढावा घेतला जाईल, असेही नौशेरवानी म्हणाले.