Marizanne Kapp Slams Cricket Australia Decision Allowing Transgender Cricketer Anaya Bangar : भारताचे माजी क्रिकेटपटू संजय बांगर यांची ट्रान्सवुमन मुलगी अनाया बांगर (Anaya Bangar) हिला क्रिकेट ऑस्ट्रेलियाने (CA) महिलांच्या स्थानिक क्रिकेटमध्ये खेळण्याची परवानगी दिल्यानंतर जागतिक क्रिकेटमध्ये मोठा वाद पेटला आहे. दक्षिण आफ्रिकेची स्टार अष्टपैलू मारिझान कॅप (Marizanne Kapp) हिने क्रिकेट ऑस्ट्रेलियाच्या या निर्णयावर तीव्र शब्दांत नाराजी व्यक्त केली आहे. कोणत्याही ट्रान्सजेंडर खेळाडूला महिलांच्या क्रिकेटमध्ये अशा प्रकारे संधी मिळणे अयोग्य असल्याचे सांगत तिने हा निर्णय पूर्णपणे हास्यास्पद ठरवला आहे.

‘अजिबात पटण्यासारखे नाही!’; ३०० आंतरराष्ट्रीय सामने खेळलेली खेळाडू संतापली –

दक्षिण आफ्रिकेसाठी आंतरराष्ट्रीय क्रिकेटच्या सर्व प्रकारांत जवळपास ३०० सामने खेळणाऱ्या ३६ वर्षीय मारिझान कॅपने इन्स्टाग्रामवर थेट नाराजी उघड केली. अनाया बांगरशी संबंधित एका बातमीचा स्क्रीनशॉट शेअर करत तिने “हे पूर्णपणे हास्यास्पद आहे, असे मुळीच व्हायला नको,” अशी तिखट प्रतिक्रिया नोंदवली. या पोस्टमध्ये तिने ऑस्ट्रेलियाच्या प्रतिष्ठित वुमेन्स बिग बॅश लीगला (WBBL) देखील टॅग करत आपला तीव्र विरोध दर्शवला आहे.

क्रिकेट ऑस्ट्रेलियाकडून अटींच्या आधारे मान्यता; २०२७ नंतर WBBL चे दरवाजे उघडू शकतात –

South African cricket legend Marizanne Kapp has reacted strongly to Cricket Australia’s decision to allow Anaya Bangar to play in the Women’s Big Bash League, subject to meeting the required blood testosterone levels.

📸: Marizanne Kapp/IG pic.twitter.com/C9YgujLYDR

— CricTracker (@Cricketracker) August 28, 2026

लिंगबदल शस्त्रक्रियेनंतर २५ वर्षीय अनाया बांगरला क्रिकेट ऑस्ट्रेलियाच्या इंटिग्रिटी हेड जॅकी पार्ट्रिज यांनी पत्र लिहून मार्च २०२७ पर्यंत ऑस्ट्रेलियातील प्रीमियर क्रिकेट स्पर्धांमध्ये खेळण्यास पात्र घोषित केले आहे. तसेच उच्चस्तरीय एलिट क्रिकेटमध्ये (WBBL) खेळण्यासाठी तिला ऑस्ट्रेलियात पोहोचल्यावर ब्लड टेस्ट द्यावी लागेल, ज्यामध्ये तिच्या शरीरातील टेस्टोस्टेरॉनची पातळी १० nmol/L च्या खाली असणे अनिवार्य असेल. ही अट पूर्ण झाल्यास अनाया महिला बिग बॅश लीगमध्येही खेळताना दिसू शकते.

हेही वाचा – Vaibhav Sooryavanshi Dropped : द्रविडच्या नियमामुळे वैभव सूर्यवंशीचा पत्ता कट! ऑस्ट्रेलियाविरुद्ध मालिकेसाठी सेहवाग अन् द्रविडच्या लेकांची थेट एन्ट्री

आयसीसीची बंदी; बीसीसीआय अजूनही चाचपडण्याच्या भूमिकेत –

अनाया बांगरने यापूर्वी मुंबईसाठी अंडर-१९ स्तरावर सर्फराझ खान आणि मुशीर खानसोबत क्रिकेट खेळले आहे. शस्त्रक्रियेनंतर तिने बीसीसीआयकडेही महिला क्रिकेट खेळण्यासाठी परवानगी मागितली होती. आंतरराष्ट्रीय क्रिकेट परिषदेने (ICC) ट्रान्सजेंडर महिलांवर आंतरराष्ट्रीय महिला क्रिकेट खेळण्यास पूर्ण बंदी घातली आहे. बीसीसीआयच्या एका अधिकाऱ्याने स्पष्ट केले की, “अशा प्रकारचे हे पहिलेच प्रकरण असल्याने बीसीसीआयने अद्याप कोणतीही अंतिम अधिकृत भूमिका घेतलेली नाही, मात्र यावर विचारमंथन सुरू आहे.”