Manoj Jarange Patil | बीड जिल्ह्यातील मस्साजोग गावचे सरपंच संतोष देशमुख यांची काही महिन्यांपूर्वी निर्घृण हत्या करण्यात आली होती. या हत्येचे फोटो सोशल मीडियावर व्हायरल झाल्यानंतर आता तीव्र प्रतिक्रिया समोर येत आहेत. हे फोटो समोर आल्यानंतर आता मराठा आंदोलक मनोज जरांगे पाटील यांनी मंत्री धनंजय मुंडे यांच्या राजीनाम्याची मागणी करत संताप व्यक्त केला आहे. तसेच, संतोष देशमुख यांच्या हत्येचा बदला घेणार असल्याचा इशाराच जरांगे यांनी दिला आहे.

संतोष देशमुख यांच्या हत्या प्रकरणातील मारहाणीचे 15 फोटो आणि 3 व्हीडीओ व्हायरल झाले आहेत. हे फोटो समोर आल्यानंतर मनोज जरांगे यांनी तातडीने मस्साजोग गाठत संतोष देशमुख यांचे बंधू धनंजय देशमुखांची भेट घेतली. यावेळी बोलताना त्यांनी धनंजय देशमुख यांच्यावर जोरदार टीका केली.

संतोष देशमुख यांच्या हत्या प्रकरणात धनंजय मुंडे यांचे निकटवर्तीय वाल्मिक कराडचे नाव समोर आले आहे. यावरून जरांगे पाटलांनी मुंडे यांच्या राजीनाम्याची मागणी केली आहे. धनंजय मुंडेंना लाथ मारून बाहेर काढा. दीड-दोन महिन्यात काय झाले हे आम्हाला माहीत नाही. मी अजित पवार आणि देवेंद्र फडणवीस यांना सांगत आहे. त्याला आमदारकीसकट मंत्रीपदावरून काढून टाका आणि 302 मध्ये घ्या.’, अशी मागणी केली.

आरोपी जेलमध्ये असले तरी बदला होणार आणि ते जेलमधून बाहेर पडले तरी बदला होणार. संतोष भैय्या तुमचा बदला होणार, असा इशाराच यावेळी बोलताना जरांगे पाटील यांनी दिला आहे.

‘ही टोळी संपवावी लागणार आहे. या राज्यातल्या मराठ्यांना मी सांगतो की, यांना तांब्याभर पाणी सुद्धा देऊ नका. इतकी क्रूर हत्या जर आपल्या घरातल्या लेकराची झाली असती तर तुम्ही कसे वागले असतात?, असा इशारच मनोज जरांगे पाटील यांनी दिला आहे.

दरम्यान, हत्या प्रकरणातील फोटो समोर आल्यानंतर धनंजय मुंडे यांच्या राजीनाम्याच्या मागणीने जोर धरला आहे. विरोधी पक्षातील नेत्यांकडून मुंडे यांच्या राजीनाम्याची मागणी केली जात आहे.