Manoj Jarange : मराठा आरक्षण आंदोलनाचे नेते मनोज जरांगे (Manoj Jarange) यांच्या आरोग्याबाबत एक मोठी आणि चिंताजनक माहिती समोर येत आहे. छत्रपती संभाजीनगरमधील खासगी रुग्णालयातून डिस्चार्ज मिळाल्यानंतर अवघ्या २४ तासांतच, आज मंगळवारी मनोज जरांगे यांची प्रकृती पुन्हा खालावली आहे.

पश्चिम महाराष्ट्राच्या झंझावाती दौऱ्यानंतर जरांगे (Manoj Jarange) यांना प्रचंड थकवा आणि आरोग्याच्या तक्रारी जाणवू लागल्या होत्या. त्यामुळे त्यांना तातडीने छत्रपती संभाजीनगर येथील रुग्णालयात दाखल करण्यात आले होते.

डॉक्टरांच्या देखरेखीखाली काही दिवस उपचार घेतल्यानंतर त्यांची तब्येत स्थिर झाल्याने त्यांना कालच रुग्णालयातून डिस्चार्ज देण्यात आला होता. मात्र, प्रकृतीचे गांभीर्य लक्षात घेऊन त्यांचा नियोजित मराठवाडा दौरा तातडीने रद्द करण्याचा निर्णय घेण्यात आला होता.

रुग्णालयातून अंतरवाली सराटीत परतल्यानंतर आज मंगळवारी अचानक त्यांची प्रकृती पुन्हा बिघडली. त्यांना तीव्र ताप आला असून प्रचंड अशक्तपणा जाणवत आहे. प्रकृती ढासळल्याने कोणतीही जोखीम न पत्करता अंतरवाली सराटी (Manoj Jarange) येथील स्थानिक सरपंचांच्या घरी त्यांच्यावर तातडीने वैद्यकीय उपचार सुरू करण्यात आले असून डॉक्टरांच्या देखरेखीखाली त्यांना सलाईन लावण्यात आली आहे. जरांगे यांची प्रकृती पुन्हा बिघडल्याने मराठा आंदोलक आणि त्यांच्या समर्थकांमध्ये चिंतेचे वातावरण पसरले आहे.