Manoj Jarange : मराठा आरक्षणाच्या मागणीसाठी मनोज जरांगे अंतरवाली सराटीत आंदोलन करत असतानाच राज्य सरकारने मराठा-कुणबी समाजातील विद्यार्थ्यांसाठी महत्त्वाचा निर्णय घेतला आहे. सारथी संस्थेअंतर्गत परदेशात शिक्षण घेणाऱ्या विद्यार्थ्यांच्या शिष्यवृत्तीबाबत सरकारने मोठा दिलासा दिला आहे. राज्य सरकारच्या शिष्टमंडळाने जरांगे यांची भेट घेतल्यानंतर हा निर्णय घेण्यात आल्याचे सांगितले जात आहे.

महाराष्ट्र सरकारच्या नियोजन विभागाने छत्रपती शाहू महाराज संशोधन, प्रशिक्षण व मानव विकास संस्था अर्थात ‘सारथी’अंतर्गत परदेशी शिष्यवृत्तीबाबत सुधारित निर्णय घेतला आहे. 25 जुलै 2024 रोजी सामाजिक न्याय विभागाने जारी केलेल्या सुधारित धोरणाचा संदर्भ घेत, परदेशी शिष्यवृत्तीच्या एकूण रकमेवर असलेली खर्चाची मर्यादा पूर्णपणे हटवण्यात आली आहे.

या निर्णयामुळे परदेशातील नामांकित विद्यापीठांमध्ये शिक्षण घेणाऱ्या मराठा आणि कुणबी समाजातील गुणवंत विद्यार्थ्यांना मोठा आर्थिक दिलासा मिळण्याची शक्यता आहे.

छगन भुजबळ आणि जरांगे पुन्हा आमनेसामने –

दरम्यान, मराठा आरक्षणाच्या मुद्द्यावरून मंत्री छगन भुजबळ आणि मनोज जरांगे यांच्यातील संघर्ष पुन्हा तीव्र झाला आहे. जरांगे यांच्या मागण्या चुकीच्या पद्धतीने मान्य केल्यास रस्त्यावर उतरण्याचा इशारा भुजबळांनी दिला आहे. त्यावर जरांगे यांनीही भुजबळांवर पलटवार केला आहे.

जरांगे यांनी 58 लाख कुणबी प्रमाणपत्रांच्या नोंदी ग्रामपंचायतींमध्ये लावण्याची मागणी केली असून, यासाठी मराठा उपसमितीला आवाहन केले आहे. जात पडताळणी अधिकाऱ्यांवरही त्यांनी आरोप केले आहेत. दुसरीकडे, जात पडताळणी समितीवर दबाव असल्याचा दावा भुजबळांनी केला आहे. समितीकडून गोरगरीब मराठ्यांवर अन्याय होत असल्याचे प्रत्युत्तर जरांगे यांनी दिले आहे.

मराठा समाजाला ओबीसी समाजाच्या सवलती मिळाव्यात, अशीही जरांगे यांची मागणी आहे. त्यामुळे ओबीसी आरक्षणाच्या संरक्षणासाठी लक्ष्मण हाके आंदोलन करत असताना आता भुजबळांनीही आपली भूमिका आक्रमकपणे स्पष्ट केली आहे. “समझने वाले को इशारा काफी है,” असे म्हणत भुजबळांनी आगामी भूमिकेचे संकेत दिले आहेत.