इम्फाळ : मणिपूरमधील नागा समुदायाच्या सर्वोच्च संघटनेने ८ सप्टेंबरच्या मध्यरात्रीपासून राज्यातील नागा-बहुल भागात व्यापार बंदी लागू करण्याची घोषणा केली आहे. भारत-म्यानमार सीमेवरील फ्री मूव्हमेंट रिजिम रद्द करण्याच्या आणि आंतरराष्ट्रीय सीमेवर कुंपण घालण्याच्या निषेधार्थ हा निर्णय घेण्यात आला आहे. या व्यापार बंदी अंतर्गत, त्या सर्व नागा-बहुल जिल्ह्यांमधील राष्ट्रीय महामार्गांवर मालवाहू वाहनांची वाहतूक बंद केली जाईल. यामध्ये सेनापती, उखरुल, चंदेल, तामेंगलाँग, कामजोंग आणि नोनी जिल्हे समाविष्ट आहेत.

निवेदनात म्हटले आहे की, फ्री मूव्हमेंट रिजिम रद्द करण्याच्या आणि जबरदस्तीने सीमेवर कुंपण घालण्याच्या एकतर्फी मुद्द्यावर, नागा लोकांनी १९ जानेवारी २०२४ पासून आजपर्यंत निवेदने, आंदोलने, निदर्शने, सार्वजनिक रॅली आणि अनेक प्रेस निवेदनांद्वारे अतिशय लोकशाही पद्धतीने केंद्र सरकारला त्यांच्या भावना स्पष्टपणे व्यक्त केल्या आहेत. असे असूनही, सरकारची उदासीन वृत्ती आम्हाला एफएमआर रद्द करण्याच्या आणि जबरदस्तीने सीमेवर कुंपण घालण्याच्या विरोधात कठोर आंदोलन करण्यास भाग पाडत आहे. त्यामुळे निदान आता तरी आमचा तीव्र प्रतिसाद नोंदला जाईल.

मणिपूरची म्यानमारशी ३९८ किमी लांबीची आंतरराष्ट्रीय सीमा आहे. राज्यातील नागा संघटना एफएमआर रद्द करण्याच्या आणि सीमेवर कुंपण घालण्याच्या कामाला विरोध करत आहेत. मणिपूरमध्ये जीवनावश्यक वस्तूंचा पुरवठा आसामसारख्या इतर राज्यांमधून होतो. राष्ट्रीय महामार्ग-२ (दिमापूर ते इंफाळ) सेनापती जिल्ह्यातून जातो आणि हा मणिपूरचा सर्वात महत्वाचा राष्ट्रीय महामार्ग आहे. राष्ट्रीय महामार्ग-३७ (सिलचर ते इंफाळ) तामेंगलाँग आणि नोनी जिल्ह्यांमधून जातो.

युनायटेड नागा कौन्सिलने बुधवारी रात्री एक निवेदन जारी केले की, ११ ऑगस्ट रोजी झालेल्या परिषदेच्या बैठकीत चर्चा आणि निर्णयानुसार, आम्ही घोषित करतो की ८ सप्टेंबर २०२५ च्या मध्यरात्रीपासून पुढील सूचना येईपर्यंत सर्व नागा भागात व्यापार बंदी लागू केली जाईल. संघटनेने नागा लोकांना या व्यापार बंदीला पाठिंबा देण्याचे आवाहन केले आहे.