बारामती : बारामती तालुक्यातील कृषी क्षेत्रात राबविण्यात येत असलेल्या नैसर्गिक शेती, सेंद्रिय निविष्ठा निर्मिती, एकात्मिक कीड व्यवस्थापन आणि विविध पीक पद्धतींचा अभ्यास करण्यासाठी मणिपूर राज्यातील कृषी विभागाच्या वरिष्ठ अधिकाऱ्यांच्या शिष्टमंडळाने मौजे वढाणे येथील नैसर्गिक शेतीशाळेला भेट दिली. बारामतीतील कृषी क्षेत्रातील विविध प्रयोग आणि उपक्रमांची माहिती घेत शिष्टमंडळाने येथील पीक पद्धतीचे कौतुक केले.

महाराष्ट्र शासनाच्या कृषी विभागांतर्गत कृषी तंत्रज्ञान व्यवस्थापन यंत्रणा (आत्मा), पुणे यांच्या वतीने वढाणे येथे आयोजित मका पिकावरील चौथ्या नैसर्गिक शेतीशाळा वर्गाला मणिपूर कृषी शिष्टमंडळाने भेट दिली. यावेळी मणिपूर राज्याच्या कृषी विभागाच्या कृषी संचालक श्रीमती मृनालीनी माईबम, आत्माच्या राज्य समन्वयक श्रीमती निशा निछोंगजम, कृषी अधिकारी इंद्रजीत सिंग यांच्यासह १२ अधिकाऱ्यांचे शिष्टमंडळ उपस्थित होते.  (Baramati News)

शेतीशाळेमध्ये मका पिकावरील लष्करी अळीचे एकात्मिक तसेच सेंद्रिय पद्धतीने नियंत्रण करण्याबाबत कृषी विज्ञान केंद्राचे प्रकल्प समन्वयक आशिष भोसले यांनी सविस्तर मार्गदर्शन केले. यावेळी निमार्क तयार करणे व त्याची फवारणी करणे, तसेच पिकामध्ये पक्षी थांबे उभारून जैविक व एकात्मिक पद्धतीने लष्करी अळीचे नियंत्रण कसे करता येते, याचे तांत्रिक प्रात्यक्षिक देण्यात आले.

राष्ट्रीय नैसर्गिक शेती अभियानांतर्गत स्थापन करण्यात आलेल्या संकल्प शेतकरी बचत गटाच्या वढाणे येथील जैव संसाधन केंद्रालाही शिष्टमंडळाने भेट दिली. या केंद्रात जैविक निविष्ठा तयार करण्याच्या पद्धतीची माहिती अधिकाऱ्यांनी घेतली. बिजामृत, जीवामृत, घनजीवामृत, दशपर्णी अर्क, निमार्क, ब्रह्मास्त्र, अग्निअस्त्र, ईएम सोल्युशन आणि वेस्ट डी-कंपोजर कल्चर आदी नैसर्गिक व जैविक निविष्ठांच्या निर्मितीचे प्रात्यक्षिक यावेळी दाखविण्यात आले.

शिष्टमंडळाने गटातील प्रगतशील शेतकरी संभाजी चौधरी यांच्या ड्रॅगन फ्रूट बागेचीही प्रक्षेत्र भेट घेतली. ड्रॅगन फ्रूटमध्ये आंतरपीक म्हणून घेण्यात आलेल्या चमेली व सूर्यफूल या पिकांची पाहणी करण्यात आली. तसेच नैसर्गिक शेतीशाळेच्या माध्यमातून गावात राबविण्यात आलेल्या चायनीज पद्धतीच्या मका लागवड प्रात्यक्षिकालाही भेट देण्यात आली. शेतकरी गट आणि सेंद्रिय शेतीशाळेच्या माध्यमातून राबविण्यात येत असलेल्या विविध कृषी उपक्रमांची माहिती शिष्टमंडळाने सविस्तर जाणून घेतली.

दरम्यान, मणिपूरच्या शिष्टमंडळाने तालुक्यात प्रधानमंत्री सूक्ष्म अन्नप्रक्रिया योजनेअंतर्गत मौजे रुई येथे उभारण्यात आलेल्या वसंत चौधरी यांच्या लाकडी तेलघाणा प्रकल्पाचीही पाहणी केली. राष्ट्रीय तेलबिया अभियानांतर्गत स्थापन करण्यात आलेल्या बारामती ॲग्रो स्टार शेतकरी उत्पादक कंपनीला भेट देऊन सूर्यफूल, भुईमूग आदी तेलबिया पिकांच्या प्रक्षेत्रांची पाहणी करण्यात आली.

या दौऱ्यावेळी महाराष्ट्र राज्याच्या सेंद्रिय शेती विभागाचे राज्य समन्वयक गणेश तांबे, हवेली तालुक्याचे उपकृषी अधिकारी अमोल ढवळे, तालुका तंत्रज्ञान व्यवस्थापक प्रसाद राऊत आदी उपस्थित होते.

दौऱ्याचे नियोजन बारामती तालुक्याचे तालुका तंत्रज्ञान व्यवस्थापक विश्वजीत मगर, सहायक तंत्रज्ञान व्यवस्थापक गणेश जाधव, सहायक कृषी अधिकारी अमोल लोणकर तसेच कृषी विज्ञान केंद्राचे प्रमुख धीरज शिंदे यांनी केले.

या दौऱ्यात मणिपूरच्या कृषी विभागातील वरिष्ठ अधिकाऱ्यांनी बारामती तालुक्यातील विविध पीक पद्धतीचा सखोल अभ्यास केला. तालुक्यातील तेलबिया, फळपिके, फुलपिके, तृणधान्ये आणि कडधान्यांसह विविध पिकांमध्ये राबविण्यात येत असलेल्या आधुनिक व नैसर्गिक शेतीच्या प्रयोगांची पाहणी करून शिष्टमंडळाने बारामती तालुक्यातील कृषी उपक्रमांचे विशेष कौतुक केले.

• बारामतीच्या शेतीचा मणिपूरकडून अभ्यास
• १२ अधिकाऱ्यांचे शिष्टमंडळ बारामतीत दाखल
• वढाणेतील नैसर्गिक शेतीशाळेला भेट
• मका पिकावरील लष्करी अळी नियंत्रणाचे प्रात्यक्षिक
• बिजामृत, जीवामृत, दशपर्णी अर्क, निमार्क आदी जैविक निविष्ठांची पाहणी
• ड्रॅगन फ्रूटमधील आंतरपीक पद्धतीचा अभ्यास
• सूर्यफूल, भुईमूग आदी तेलबिया पिकांच्या प्रक्षेत्रांची पाहणी
• लाकडी तेलघाणा व शेतकरी उत्पादक कंपनीच्या प्रकल्पाला भेट
• बारामतीच्या विविध पीक पद्धती व कृषी उपक्रमांचे शिष्टमंडळाकडून कौतुक