त्रिपुराच्या नव्या मुख्यमंत्र्यांचे नाव निश्चित झाले आहे. येथे पक्षाने माणिक साहा यांच्यावरच विश्वास दाखवला आहे. मिळालेल्या माहितीनुसार, माणिक साहा त्रिपुराचे मुख्यमंत्री म्हणून शपथ घेणार आहेत. साहा दुसऱ्यांदा राज्यातील सरकारची सूत्रे हाती घेतील. तत्पूर्वी, सोमवारी संध्याकाळी त्रिपुरा भाजप विधिमंडळ पक्षाची बैठक झाली. यामध्ये माणिक साहा यांच्या नावावर एकमत होऊन त्यांची विधिमंडळ पक्षनेतेपदी निवड करण्यात आली.

8 मार्च रोजी घेणार शपथ –
8 मार्च रोजी शपथविधी सोहळा होऊ शकतो. यावेळी पंतप्रधान नरेंद्र मोदी, केंद्रीय गृहमंत्री अमित शहा आणि भाजप अध्यक्ष जेपी नड्डा उपस्थित राहणार आहेत.

गेल्या वर्षी मे महिन्यात घेतली होती मुख्यमंत्रिपदाची शपथ –
यापूर्वी गेल्या वर्षी मे महिन्यात तत्कालीन मुख्यमंत्री बिप्लब कुमार देब यांच्या राजीनाम्यानंतर माणिक साहा यांना मुख्यमंत्री करण्यात आले होते. माणिक साहा यांनी 15 मे 2022 रोजी राज्याचे मुख्यमंत्री म्हणून शपथ घेतली.

काँग्रेस सोडून भाजपमध्ये प्रवेश –
माणिक साहा यांनी 2016 मध्ये काँग्रेस सोडून भाजपमध्ये प्रवेश केला होता. 2020 मध्ये त्यांना त्रिपुरामध्ये पक्षप्रमुख बनवण्यात आले. माणिक साहा हे मुख्यमंत्री होण्याच्या एक महिना आधी राज्यसभेचे खासदार म्हणून निवडून आले होते. ते मुख्यमंत्री झाल्यानंतर, बिप्लब देब राज्यसभेचे खासदार म्हणून निवडून आले.

त्रिपुरामध्ये भारतीय जनता पक्षाने आयपीएफटीसोबत युती करून निवडणूक लढवली, तर काँग्रेसने डाव्यांशी युती केली. निवडणुकीच्या निकालात भाजपने राज्यात आपली सत्ता कायम ठेवली. भाजपला 32 आणि आयटीएफटीआयसीला एका जागेवर यश मिळाले. काँग्रेस आणि डाव्या आघाडीला मोठा धक्का बसला. काँग्रेसला तीन जागा मिळाल्या, तर डाव्यांना 11 जागा मिळाल्या. राज्यातील तेरा जागा टिपरा मोथा पक्षाच्या वाट्याला गेल्या आहेत, ज्यांनी पहिल्यांदाच निवडणूक लढवली.