मांडवगण फराटा : शिरूर तालुक्यातील पिंपळसुटी, इनामगाव, मांडवगण फराटा. शिरसगाव काटा आदी गावांमध्ये दहशत माजवणाऱ्या नरभक्षक बिबट्याला इनामगाव हद्दीत बेशुद्ध करून जेरबंद करण्यात वनविभागाला एक महिन्यांनी यश आले. त्यामुळे नागरिकांनी सुटकेचा नि: श्वास टाकला आहे.

पिंपळसूटी येथील भाग्यश्री वारे या चिमुकलीचा (दि.२२) जुलै रोजी बिबट्याच्या हल्ल्यात दुर्दैवी मृत्यू झाला होता. यापूर्वी परिसरामध्ये बिबट्याच्या हल्ल्यात मनुष्यहानीच्या घटना घडल्याने स्थानिकांनी आक्रमक होऊन रास्ता रोको आंदोलन करत बिबट्याचा बंदोबस्त करण्याची मागणी केली होती.

दरम्यान, वनविभागाने बिबट्या पकडण्यासाठी परिसरात शोध मोहीम राबवत १५ पिंजरे, ५० ट्रॅप कॅमेरे व ड्रोनने बिबट्याचा शोध घेण्याचे प्रयत्न सुरू केले. जुन्नर वन विभागाचे उपवनसंरक्षक प्रशांत खाडे, सहायक उपवनसंरक्षक स्मिता राजहंस, शिरूर वनपरिक्षेत्र अधिकारी निळकंठ गव्हाणे यांच्या मार्गदर्शनाखाली तर वनपरिमंडल अधिकारी भानुदास शिंदे यांच्या नेतृत्वाखाली नियतक्षेत्र वनाधिकारी गणेश डोईफोडे, जालिंदर सानप, शेखर जानगवळी, गणेश झिरपे, नाना चव्हाण, रेस्क्यू टीम सदस्य नवनाथ गांदले, गोविद शेलार, शरीफ शेख, सुधीर शितोळे, सुनील कळसकर, मनोज चौधरी, अमोल पाटोळे, शरद गदाद, राहुल अवचिते, रोहिदास शेंडगे, संदीप गव्हाणे, रेस्क्यू चेरीटेबल संस्था बावधनचे श्रीनाथ चव्हाण, डॉ. समृद्धी खंडारे, संजोग गोळे, अथर्व काळे, वैभव भोगले, सागर सुतार, प्रचिती भुतकर हे महिन्याभरापासून बिबट्याला जेरबंद करण्यासाठी प्रयत्न करीत होते.

मात्र, बिबट्या एक महिन्यापासून वन विभागाला गुंगारा देत होता. अखेर पहाटेच्या सुमारास इनामगाव हद्दीत नलगेमळा येथे श्रीनिवास गाडगे यांच्या शेताजवळ बिबट्या शिकारीसाठी आलेला असताना वन विभागाच्या पथकाने त्याला अचूकपणे बेशुद्ध करीत जेरबंद केले. जेरबंद बिबट्याला पुढील उपचारासाठी माणिकडोह बिबट निवारा केंद्र येथे दाखल केल्याची माहिती वनपरिक्षेत्र अधिकारी निळकंठ गव्हाणे यांनी दिली आहे.