Bristi Mukherjee Ghatak : पश्चिम बंगालच्या माजी मुख्यमंत्री ममता बॅनर्जी यांच्या भाचीचा बिरभूम जिल्ह्यातील रामपूरहाट येथील घरात मृतदेह आढळल्याने खळबळ उडाली आहे. बृष्टी मुखर्जी घटक (वय २८) यांचा मृतदेह मंगळवारी दुपारी त्यांच्या घराच्या दुसऱ्या मजल्यावरील एका खोलीत आढळून आला.

माहिती मिळताच पोलिसांनी घटनास्थळी धाव घेतली. मृतदेह रामपूरहाट शासकीय वैद्यकीय महाविद्यालय आणि रुग्णालयात शवविच्छेदनासाठी पाठवण्यात आला आहे. मृत्यूचे कारण अद्याप स्पष्ट झाले नसून, शवविच्छेदन अहवालानंतर त्याबाबत अधिक माहिती समोर येईल, असे वरिष्ठ पोलीस अधिकाऱ्याने सांगितले.

कुटुंबीयांच्या माहितीनुसार, बृष्टी मुखर्जी गेल्या काही वर्षांपासून नैराश्याने त्रस्त होत्या आणि त्यांच्यावर उपचार सुरू होते. तसेच पतीसोबत त्यांची घटस्फोटाची प्रक्रिया सुरू होती, अशी माहिती स्थानिक वृत्तांमध्ये देण्यात आली आहे.  (Bristi Mukherjee Ghatak)

 

 

दरम्यान, शाळा भरती प्रकरणात बृष्टी मुखर्जी यांच्यावर बेकायदेशीर पद्धतीने शिक्षकाची नोकरी मिळवल्याचा आरोपही झाला होता. सरकारी अनुदानित शाळांमधील भरती प्रक्रियेतील अनियमिततेमुळे नियुक्त्या रद्द करण्याचा आदेश सर्वोच्च न्यायालयाने दिल्यानंतर त्यांची नोकरी गेल्याचे कुटुंबीयांनी सांगितले.

पोलिसांनी या मृत्यूचा तपास सुरू केला आहे. शवविच्छेदन अहवालातून मृत्यूमागील नेमके कारण स्पष्ट होण्याची शक्यता आहे.