Mamata Banerjee : पश्चिम बंगालच्या माजी मुख्यमंत्री आणि तृणमूल काँग्रेसच्या अध्यक्ष ममता बॅनर्जी यांच्या सुरक्षेबाबत प्रश्न उपस्थित झाले आहेत. कालीघाट येथील त्यांच्या निवासस्थानाबाहेर एका महिलेने त्यांच्यावर झडप घालण्याचा प्रयत्न केल्याचा आरोप आहे. या महिलेने ममता बॅनर्जी यांची साडी ओढल्याचा आणि तिच्याकडे चाकू सापडल्याचा दावा तृणमूल काँग्रेसच्या कार्यकर्त्यांनी केला आहे.

मंगळवारी (१३ ऑक्टोबर) संध्याकाळी ममता बॅनर्जी दुर्गापूजेच्या कार्यक्रमाचे उद्घाटन करण्यासाठी घराबाहेर पडत होत्या. त्यावेळी ही महिला त्यांच्या जवळ पोहोचली. तिने स्वतःला एका नेत्याची भाची असल्याचे सांगितल्याचा दावा आहे. ममता बॅनर्जी घराबाहेर येताच महिलेने त्यांची साडी ओढली. त्यानंतर उपस्थित कार्यकर्त्यांनी तिला पकडून पोलिसांच्या ताब्यात दिले.

या महिलेच्या जवळ साडीमध्ये लपवलेला चाकू सापडल्याचा आरोप आहे. ती नागरी स्वयंसेवक असल्याची माहितीही सुरुवातीला समोर आली. मात्र, महिलेची ओळख आणि या घटनेमागील कारण अद्याप स्पष्ट झालेले नाही.

या प्रकरणी कालीघाट तृणमूल काँग्रेसच्या नेत्यांनी पोलिस ठाण्यात लेखी तक्रार दिल्याचे वृत्त आहे. घटनेनंतरही ममता बॅनर्जी पूजा उद्घाटनाच्या कार्यक्रमासाठी रवाना झाल्या.