Politics News : पश्चिम बंगाल विधानसभा निवडणुकीतील पराभवानंतर तृणमूल काँग्रेसमध्ये मोठी फूट पडल्याच्या पार्श्वभूमीवर पक्षाच्या काँग्रेसमध्ये संभाव्य विलीनीकरणाच्या चर्चांना वेग आला आहे.

दरम्यान, विविध माध्यमांतील सूत्रांच्या हवाल्याने असा दावा करण्यात आला आहे की, तृणमूल काँग्रेसच्या प्रमुख ममता बॅनर्जी या विलीनीकरणासाठी सकारात्मक आहेत. मात्र, त्यांचे पुतणे आणि पक्षाचे राष्ट्रीय सरचिटणीस अभिषेक बॅनर्जी यांनी ममता बॅनर्जी यांना राज्यसभेत विरोधी पक्षनेतेपद देण्याची मागणी केल्याची चर्चा आहे.

मिळालेल्या माहितीनुसार, अभिषेक बॅनर्जी यांनी काँग्रेस नेते राहुल गांधी यांच्यासोबत झालेल्या बैठकीत ममता बॅनर्जी यांना काँग्रेसमार्फत राज्यसभेत पाठवून सध्या मल्लिकार्जुन खरगे यांच्याकडे असलेले विरोधी पक्षनेतेपद देण्याचा प्रस्ताव मांडल्याचे सांगितले जात आहे. या वृत्ताला अद्याप अधिकृत दुजोरा मिळालेला नाही.

टीएमसीमध्ये मोठ्या फुटीचा दावा –  (Politics News)

सूत्रांच्या माहितीनुसार, विधानसभा निवडणुकीनंतर ऋतब्रत बॅनर्जी यांच्या नेतृत्वाखाली पक्षात मोठी फूट पडली असून ५८ आमदारांनी त्यांना विरोधी पक्षनेते म्हणून निवडल्याचे सांगितले जात आहे. यानंतर लोकसभा आणि राज्यसभेतील अनेक खासदारांनीही ममता बॅनर्जींपासून अंतर ठेवण्यास सुरुवात केल्याचा दावा करण्यात येत आहे.

सुखेंदू शेखर रॉय, सुष्मिता देव यांच्यासह काही खासदारांनी राजीनामे दिल्याची चर्चा असून, काकोली घोष यांच्या नेतृत्वाखाली २० हून अधिक खासदारांनीही बंडाचे संकेत दिल्याचे वृत्त आहे. सायोनी घोष यांचाही या गटात समावेश असल्याचे सांगितले जात आहे.

राहुल गांधी आणि अभिषेक बॅनर्जी यांची भेट –   (Politics News)

दिल्लीत राहुल गांधी आणि अभिषेक बॅनर्जी यांच्यात बुधवारी बैठक झाल्याचे वृत्त आहे. विरोधी पक्षांच्या ‘इंडिया’ आघाडीतील समन्वय आणि भविष्यातील राजकीय घडामोडींच्या पार्श्वभूमीवर ही भेट महत्त्वाची मानली जात आहे.

 

यापूर्वी ममता बॅनर्जी यांनी सोनिया गांधी यांची १०, जनपथ येथे भेट घेतली होती. या भेटीत तृणमूल काँग्रेसच्या काँग्रेसमध्ये विलीनीकरणाबाबत चर्चा झाल्याचा दावा केला जात असून, ममता बॅनर्जी यांना राष्ट्रीय उपाध्यक्षपद आणि अभिषेक बॅनर्जी यांना काँग्रेसच्या महासचिवपदाची ऑफर देण्यात आल्याचीही सूत्रांची माहिती आहे. या प्रस्तावावर विचार करण्यासाठी ममता बॅनर्जी यांनी काही दिवसांचा अवधी मागितल्याचे वृत्त आहे.

1998 ला झाली तृणमूल काॅंग्रेसची स्थापना –   (Politics News)

ममता बॅनर्जी या काॅंग्रेस पक्षाच्या पश्चिम बंगालमधील प्रमुख नेत्या होत्या. काॅंग्रेस पक्षासोबत झालेल्या राजकीय मतभेदानंतर त्यांनी स्वत:चा नवीन पक्ष काढण्याचा निर्णय घेत 1 जानेवारी 1998 रोजी तृणमूल काॅंग्रेसची स्थापना केली होती.