Mallikarjun Kharge: अरुणाचल प्रदेश सीमेवर भारत आणि चीन यांच्यात झालेल्या संघर्षावरून काँग्रेस पक्षाने केंद्र सरकारवर निशाणा साधला आहे. काँग्रेस अध्यक्ष मल्लिकार्जुन खरगेंनी आज भाजपाला ३ सवाल केले. त्यासोबतच त्यांनी, “चीनला क्लीन चिट देणे थांबवले पाहिजे.” असेही म्हटले आहे.

तसेच पंतप्रधान नरेंद्र मोदी यांच्यावर निशाणा साधत ते म्हणाले की, त्यांनी देशाला सत्य सांगावे. खरगेंनी या प्रकरणी केंद्र सरकारला तीन प्रश्नही उपस्थित केले. त्यांनी राष्ट्रीय सुरक्षा आणि आर्थिक सुरक्षेला संबोधित केले.

केंद्र सरकारवर प्रश्नचिन्ह उपस्थित करत खरगेंनी सोशल मीडियावर पोस्ट करत,”चीनला क्लीन चिट देणे थांबवा. पंतप्रधान मोदींनी देशाला सत्य सांगावे. त्यांनी या तीन प्रश्नांची उत्तरे द्यावीत.” असे म्हटले. काँग्रेस अध्यक्षांनी राष्ट्रीय सुरक्षा, आर्थिक सुरक्षा आणि राजनैतिक उत्तरदायित्वाशी संबंधित प्रश्न उपस्थित केले.

ते म्हणाले, “आयटीबीपीच्या डीजींनी अरुणाचल प्रदेशात चिनी सैन्यासोबत सुरू असलेल्या संघर्षाला दुजोरा दिला आहे, ही अत्यंत चिंताजनक बाब आहे. डोकलाम आणि गलवाननंतर आणखी एक संघर्ष झाला आहे का? ऑगस्टमध्ये, तकसींगजवळ चिनी घुसखोरीच्या बातम्या आल्या होत्या.” तरीही, वाछा-दमाई येथे कॉर्प्स कमांडर स्तरावरील चर्चेनंतर ४७ दिवसांनीही तणाव कायम आहे. भारताच्या गस्तीच्या अधिकारांशी तडजोड झाली आहे का? देशाला अंधारात का ठेवले जात आहे?

आर्थिक सुरक्षेबद्दल खरगे काय म्हणाले ?

आर्थिक सुरक्षेचा संदर्भ देत खरगे यांनी विचारले, “गलवान खोऱ्यात (आर्थिक वर्ष २०२०-२१) भारतीय लष्कराच्या २० शूर जवानांच्या सर्वोच्च बलिदानानंतर, चीनकडून होणारी आयात १०२ टक्क्यांनी वाढली आहे, तर चीनसोबतची भारताची व्यापार तूट १५५ टक्क्यांनी वाढून ११२.१६ अब्ज डॉलर्सवर पोहोचली आहे. ‘मेक इन इंडिया’ आता ‘चीनमधून आयात’ झाले आहे का?”

दरम्यान, आयटीबीपीचे डीजी शत्रुघ्न कपूर यांनी अलीकडेच म्हटले आहे की भारत आणि चीन यांच्यातील तणाव खूप काळापासून सुरू आहे. अरुणाचल प्रदेशच्या सीमेवरही भारत आणि चीन यांच्यात संघर्ष झाला होता. त्यांच्या या वक्तव्यामुळे राजकीय गदारोळ निर्माण झाला आहे.