मुंबई – अभिनेत्री मलायका अरोराच्या वडिलांच्या आकस्मिक निधनाच्या बातमीने संपूर्ण बॉलिवूडमध्ये शोककळा पसरली आहे. मलायका अरोरा आणि अमृता अरोरा यांचे सावत्र वडील अनिल मेहता यांनी आत्महत्या केल्याचे बोलले जात आहे. त्यांनी वांद्रे येथील फ्लॅटच्या सहाव्या मजल्यावरून उडी मारून आत्महत्या केली. मुंबई पोलिसांनीही प्रथमदर्शनी ही आत्महत्या असल्याचे म्हटले आहे. या घटनेची माहिती मिळताच मुंबई पोलिसांनी घटनास्थळ गाठून तपास सुरू केला. तसेच अनिल मेहता यांचा मृतदेह पोस्टमॉर्टमसाठी पाठवण्यात आला आहे. मात्र, त्यांच्या आत्महत्येचे कारण अद्याप स्पष्ट झालेले नाही.

अनिल मेहतांचा आत्महत्येपूर्वी मुलींना फोन-

दरम्यान, आत्महत्या करण्यापूर्वी अनिल मेहता यांनी त्यांच्या सावत्र मुली अमृता अरोरा आणि मलायका अरोरा यांना फोन करून दोघींशी बोलल्याचे सांगितले जात आहे. फोनवर अनिल मेहता यांनी त्यांच्या दोन्ही मुलींना ‘मी आता थकलो आहे’ असे सांगितले होते. अनिल मेहता यांनी आत्महत्येपूर्वी मलायका आणि अमृताला फोन केला होता. इतकेच नाही तर अनिल मेहता यांनी फ्लॅटच्या सहाव्या मजल्यावरून उडी मारली तेव्हा मलायकाची आई जॉयस पॉलीकॉर्पही त्या फ्लॅटमध्ये उपस्थित होती.

वडिलांच्या निधनाची बातमी समजताच मलायका-अमृता घरी पोहोचल्या –

मलायका आणि अमृता यांना वडिलांच्या निधनाची बातमी समजताच दोन्ही बहिणी त्यांच्या आई-वडिलांच्या घरी पोहोचल्या. मलायका आणि अमृताचा एक व्हिडिओ देखील सोशल मीडियावर समोर आला आहे, ज्यामध्ये ते त्यांचे पालक राहतात त्या अपार्टमेंटकडे चालत जाताना, अस्वस्थ आणि रडताना दिसत आहेत. रिपोर्ट्सनुसार, मलायका तिच्या वडिलांनी आत्महत्या केली तेव्हा मुंबईत नव्हती.

हे स्टार्स मलायकाच्या घरी पोहोचले –

मलायकाचे वडील अनिल मेहता यांनी बुधवारी सकाळी घराच्या सहाव्या मजल्यावरून उडी मारून आत्महत्या केल्याचे सांगितले जात आहे. मलायकाच्या आईने या संदर्भात तिचा जबाब नोंदवला आहे. अनिल मेहता यांच्या निधनाची बातमी समजताच अनेक स्टार्स मलायकाच्या घरी पोहोचले. करीना कपूर, सैफ अली खान, अरबाज खान, अर्जुन कपूर, अनन्या पांडे, चंकी पांडे आणि नेहा धुपिया यांच्यासह अनेक स्टार्स अभिनेत्री आणि तिच्या कुटुंबाचे सांत्वन करण्यासाठी आले होते.