MJP : सरन्यायाधीश सूर्यकांत यांच्या एका टिप्पणीमुळे सोशल मीडियावर ‘मख्खी जनता पार्टी’ (MJP) नावाची विनोदी संघटना चर्चेत आली आहे. या संघटनेने दावा केला आहे की, अवघ्या ७२ तासांत त्यांच्या इन्स्टाग्राम खात्याला ४० लाखांहून अधिक व्ह्यूज आणि ३.३ लाखांपेक्षा जास्त फॉलोअर्स मिळाले आहेत.

काय आहे माशीचा संदर्भ?

९ ऑक्टोबर रोजी सर्वोच्च न्यायालयात एका सुनावणीदरम्यान सरन्यायाधीश सूर्यकांत यांनी ‘माशी मारण्यासाठी हातोड्याचा वापर करता येत नाही’, अशी टिप्पणी केली होती. दिल्लीतील सार्वजनिक वाहतूक पूर्णपणे बंद करण्याच्या निर्णयावर न्यायालयाने प्रश्न उपस्थित केले होते. सुरक्षेच्या कारणास्तव नियम लावणे योग्य असू शकते; मात्र संपूर्ण व्यवस्था बंद करणे हा अतिशय मोठा निर्णय ठरू शकतो, असे न्यायालयाने स्पष्ट केले होते.

याच टिप्पणीवरून ‘मख्खी जनता पार्टी’ हे नाव पुढे आले. संघटनेने सोशल मीडियावर पोस्ट करत, आता माशीदेखील आपला आवाज उठवणार, असा उपरोधिक संदेश दिला.

‘कॉकरोच जनता पार्टी’शी हातमिळवणी?

‘कॉकरोच जनता पार्टी’ (CJP) या संघटनेलाही एका टिप्पणीवरील वादानंतर प्रसिद्धी मिळाली होती. तरुण आणि विद्यार्थ्यांच्या आंदोलनाशी संबंधित असलेल्या या संघटनेने जंतर-मंतरवरील आंदोलनातून राजकीय उत्तरदायित्वाची मागणी केली होती.

MJP ने CJP सोबत समन्वय साधण्याची तयारी दर्शवली आहे. तसेच मुख्य निवडणूक आयुक्त ज्ञानेश कुमार यांच्याविरोधात आवाज उठवणाऱ्या नेहा बोरा यांनाही पाठिंबा दिला आहे.

आंदोलन आणि लोकशाही हक्कांवर भर

MJP ने जंतर-मंतरवर भारतीय ध्वज फडकवल्यानंतर ताब्यात घेतलेल्या CJP च्या आशुतोष रांका आणि सौरव दास यांच्याबाबत प्रश्न उपस्थित केले. शांततापूर्ण आंदोलन, लोकशाही हक्क आणि नागरिकांचा सहभाग यांना संघटनेने पाठिंबा दिला आहे. मात्र, आंदोलन करताना कायद्याचे पालन करण्याचे आवाहनही केले आहे.