मुंबई : जात पडताळणी प्रमाणपत्र काढण्यासाठी सर्वसामान्य लोकांना अनेकवेळा अडचणींचा सामना करावा लागतो. या प्रमाणपत्रासाठी सर्वसामान्यांना अनेकदा शासकीय कार्यालयांची पायरी चढावी लागते. शहरी भागात राहणाऱ्या नागरिकांना आपल्या गावी जावून पाठपुरावा करावा लागतो. यामुळे हे प्रमाणपत्र काढताना लोकांची खूप अडचण होते. हा त्रास कमी व्हावा म्हणून मुख्यमंत्री देवेंद्र फडणवीस यांनी जात पडताळणी प्रक्रिया ऑनलाईन करण्याचे आदेश दिले आहेत.

नागरिकांना मिळणार दिलासा
मुख्यमंत्र्यांनी घेतलेल्या या निर्णयामुळे लोकांना मोठा दिलासा मिळाला आहे. ऑफलाईन कामे करत असताना, काही वेळेला काही शासकीय कर्मचारी किंवा अधिकाऱ्यांनी दुर्लक्ष केलं तर आपली फाईल तशीच जागेवर पडून राहते. पण ऑनलाईन अर्ज केला आणि किती दिवस आपलं काम झालं नाही ते ऑनलाईन समजतं. ऑनलाईन असल्यामुळे सगळ्या गोष्टी पारदर्शकपणे समजतात. त्यामुळे मुख्यमंत्र्यांनी जात पडताळणी प्रक्रिया ऑनलाईन करा, असे आदेश दिले आहेत.

तसेच संजय गांधी निराधार योजना, श्रावणबाळ सेवा राज्य निवृत्तिवेतन योजनेच्या अर्थसाहाय्याचे वितरण हे थेट लाभ हस्तांतरण (DBT) पोर्टलच्या माध्यमातून लाभार्थ्यांच्या थेट बँक खात्यात वर्ग करण्याची प्रक्रिया तात्काळ सुरू करावी, असे निर्देशदेखील मुख्यमंत्री देवेंद्र फडणवीस यांनी दिले आहेत. तसेच जात पडताळणी प्रक्रिया आणि विद्यार्थी वसतीगृह प्रवेश प्रक्रियासुद्धा ऑनलाईन करण्यात येणार आहे.