जामखेड :जामखेड तालुक्यातील खर्डा येथील नागोबाचीवाडी परिसरामध्ये अन्न व औषध प्रशासनाने (FDA) छापा टाकून दुध भेसळीसाठी वापरला जाणारा तब्बल ५ लाख २७ हजार ५६० रुपये किमतीचा विनालेबल स्किम्ड मिल्क पावडरचा साठा जप्त केला आहे. आरोग्यदायी नियमांचे आणि अन्न सुरक्षा मानकांचे उघडपणे उल्लंघन करून साठवण्यात आलेला हा सुमारे २ हजार ३९८ किलो वजनाचा साठा प्रशासनाने JCB च्या साह्याने खड्डा करून जमिनीत गाडून नष्ट केला आहे. याप्रकरणी रामदास भानुदास गोपाळघरे याच्यावर खर्डा पोलीस ठाण्यात गुन्हा दाखल करण्यात आला आहे.

अन्न व औषध प्रशासनाकडून अचानक पाहणी

मिळालेल्या माहितीनुसार, अन्न सुरक्षा अधिकारी प्रदीप परशुराम पवार, ड. रा. सूर्यवंशी, नाशिकचे अन्न सुरक्षा अधिकारी प्रतीक भड आणि सहाय्यक आयुक्त सो. ह. इंगळे यांच्या पथकाने २९ सप्टेंबर २०२६ रोजी सकाळी १०:३० वाजता खर्डा येथील सूर्यभान गणपत खाडे यांच्या शेतात (अमृतलिंग मंदिराजवळ, नागोबाचीवाडी) धाड टाकली. त्या ठिकाणी रामदास भानुदास गोपाळघरे (वय २८, रा. नागोबाचीवाडी, खर्डा, ता. जामखेड) हा उपस्थित होता.

तपासणीदरम्यान पथकाला त्या ठिकाणी विनालेबल प्लास्टिक बॅगमध्ये भरलेला स्किम्ड मिल्क पावडरचा मोठा साठा आढळून आला. हा साठा थेट जमिनीवर अस्तव्यस्त अवस्थेत ठेवलेला होता आणि छतातून ठिकठिकाणी पाणी गळत असलेल्या अत्यंत अस्वच्छ वातावरणात साठवण्यात आला होता. या पावडरच्या गोण्यांवर कोणताही लेबल, उत्पादन दिनांक किंवा मुदतबाह्य दिनांक नमूद नव्हता. तसेच गोपाळघरे याच्याकडे अन्न सुरक्षा कायद्यान्वये आवश्यक असणारा परवाना किंवा खरेदी-विक्रीचा कोणताही अधिकृत अभिलेख उपलब्ध नव्हता.

अन्न सुरक्षा अधिकाऱ्यांनी याठिकाणाहून विश्लेषणासाठी आवश्यक ते नमुने शासकीय नियमानुसार सीलबंद करून ताब्यात घेतले. दुध भेसळीसाठी या भेसळयुक्त साठ्याचा वापर होऊ नये यासाठी उर्वरित १२० गोण्यांमधील एकूण २,३९८ किलो ग्रॅम स्किम्ड मिल्क पावडर (किंमत ₹५,२७,५६०/-) कलम ३८(१)(बी) नुसार जप्त करण्यात आली. आरोपीने हा साठा सुरक्षित ठेवण्यास असमर्थता दर्शवल्याने तसेच अन्न विश्लेषण अहवाल येईपर्यंत आरोग्यास घातक असणारा हा पदार्थ नष्ट करण्याची नोटीस दिल्यानंतर, खाडे वस्ती येथील शेतामध्ये JCB च्या साह्याने खड्डा करून सर्व पावडर ओतून त्यावर माती टाकून नष्ट करण्यात आली.

या कारवाईप्रकरणी अन्न सुरक्षा अधिकारी प्रदीप परशुराम पवार यांच्या फिर्यादीवरून खर्डा पोलीस ठाण्यात आरोपी रामदास भानुदास गोपाळघरे याच्याविरुद्ध अन्न सुरक्षा व मानके कायदा २००६ च्या कलम २६(१), २६(२)(i), ३१, ५७, ५९, ६३ आणि भारतीय न्याय संहिता (BNS) २०२३ मधील कलम १२३, २७४, २७५ अन्वये गुन्हा दाखल करण्यात आला आहे. या कारवाईमुळे दुध भेसळ करणाऱ्यांचे आणि बेकायदेशीर अन्नपदार्थ साठवणाऱ्यांचे धाबे दणाणले आहेत.