जामखेड : जामखेड पोलीस स्टेशनच्या गुन्हे प्रकटीकरण व गस्त पथकाने आज पहाटेच्या सुमारास एक मोठी कारवाई करत कत्तलीच्या उद्देशाने निर्दयीपणे वाहतूक केली जाणारी गोवंश जातीची ४ जनावराची सुटका केली आहेत. या कारवाईत पोलिसांनी २ लाख ६० हजार रुपयांचा मुद्देमाल जप्त केला असून तीन आरोपींना चौकशीसाठी ताब्यात घेतले आहे.

मिळालेल्या माहितीनुसार, दिनांक २ जुलै २०२६ रोजी पहाटे ३:०० वाजण्याच्या सुमारास जामखेड पोलीस ठाण्याचे पोलीस कॉन्स्टेबल योगेश दत्तात्रय दळवी, चालक पोलीस कॉन्स्टेबल महादेव मिसाळ, होमगार्ड प्रताप नारायण पवार आणि कृष्णा कैलास विर हे हाळगाव ते नान्नज रोडवर पेट्रोलिंग करत होते. यावेळी नान्नज गुरक्षेत्र हद्दीत पोलिसांना एक संशयास्पद टाटा कंपनीची ‘एस’ (Tata ACE) गाडी (क्र. MH 16 DP २८४६) येताना दिसली. पोलिसांनी तात्काळ वाहन थांबवून त्याची तपासणी केली.

गाडीची तपासणी केली असता, त्यामध्ये अत्यंत दाटीवाटीने आणि निर्दयीपणे ४ जर्सी जातीच्या गाई (३ काळ्या-पांढऱ्या रंगाच्या आणि १ तांबड्या रंगाची) बांधून ठेवल्याचे आढळून आले. वाहनातील व्यक्तींकडे अधिक चौकशी केली असता, त्यांनी ही जनावरे नान्नज येथून घेऊन केज (जिल्हा बीड) येथे कत्तलीसाठी घेऊन जात असल्याची कबुली दिली.

याप्रकरणी पोलिसांनी खालील तीन आरोपींना ताब्यात घेतले आहे तानाजी संभाजी नाईक (वय ४० वर्षे, रा. सुतारगल्ली, खर्डा, ता. जामखेड) सोहेल आझाद कुरेशी (वय २२ वर्षे, रा. इंदिरानगर, नान्नज, ता. जामखेड) लक्ष्मण बाबासाहेब हाळनवर (वय २९ वर्षे, रा. मोहरी, ता. जामखेड) २,००,०००/- रुपये किमतीची खाकी फिकट रंगाची टाटा ‘एस’ गाडी (MH 16 DP २८४६).६०,०००/- रुपये किमतीच्या ४ जर्सी गाई (प्रत्येकी १५,०००/- रुपये).एकूण अंदाजे किंमत: २,६०,०००/- रुपये आहे

पोलीस कॉन्स्टेबल योगेश दळवी यांच्या फिर्यादीवरून जामखेड पोलीस ठाण्यात आरोपींविरुद्ध महाराष्ट्र प्राणी संरक्षण अधिनियम १९७६ चे कलम ५, ९, ११ (बी) तसेच प्राण्यांना क्रूरतेने वागवण्यास प्रतिबंध अधिनियम १९६० चे कलम ११ अन्वये गुन्हा दाखल करण्यात आला आहे. दोन पंचांसमक्ष सर्व मुद्देमाल जप्त करण्यात आला असून पुढील तपास पोलीस निरीक्षक दशरथ चौधरी यांच्या मार्गदर्शनाखाली हवालदार तुकाराम सोनवणे करत आहेत. पोलिसांच्या या धडक कारवाईमुळे परिसरातील अवैध वाहतूक करणाऱ्यांचे धाबे दणाणले आहेत.