Mahhi Vij and Jay Bhanushali : टीव्ही विश्वातील लोकप्रिय जोडी माही विज आणि जय भानुशाली  (Jay Bhanushali )  यांच्या घटस्फोटानंतरही त्यांच्यातील नातं चर्चेचा विषय ठरत आहे. तब्बल १४ वर्षांचा संसार केल्यानंतर या दोघांनी जानेवारी २०२६ मध्ये अधिकृतपणे घटस्फोट घेतला. मात्र नातं संपलं असलं तरी त्यांच्यात कटुता नसून आजही ते एकमेकांचा आदर करतात, हे माही विजने नुकत्याच दिलेल्या मुलाखतीत स्पष्ट केलं आहे.

माही विजने अभिनेता आणि सूत्रसंचालक राजीव खंडेलवाल यांच्या ‘तुम हो ना’ या कार्यक्रमात हजेरी लावली होती. या कार्यक्रमात तिने तिच्या वैयक्तिक आयुष्याबाबत अनेक गोष्टी मनमोकळेपणाने सांगितल्या. विशेष म्हणजे तिने माजी पती जय भानुशाली आणि त्याच्या कुटुंबाबद्दलही सकारात्मक भावना व्यक्त केल्या.

माहीने सांगितलं की, घटस्फोटानंतरही ती आणि जय चांगले मित्र आहेत. दोघे मिळून त्यांच्या मुलांची जबाबदारी सांभाळत आहेत. दत्तक घेतलेली मुलं खुशी आणि राजवीर तसेच त्यांची मुलगी तारा यांच्या संगोपनासाठी दोघेही एकत्र काम करत आहेत.  (Mahhi Vij and Jay Bhanushali)

यावेळी माहीने एक भावनिक गोष्टही सांगितली. तिचे वडील आणि जय यांच्यात आजही चांगले संबंध आहेत. जय अजूनही तिच्या घरी येतो, तिच्या वडिलांशी गप्पा मारतो आणि त्यांच्याबरोबर वेळ घालवतो. याबद्दल बोलताना माही म्हणाली, “माझे वडील आजही जयला भेटतात. ते दोघे एकत्र चहा पितात, गप्पा मारतात. जय आमच्या घरी येतो. आमच्यात कोणतीही कटुता नाही. आम्ही अजूनही एका कुटुंबासारखे आहोत आणि याचा मला आनंद आहे.”  (Mahhi Vij and Jay Bhanushali)

घटस्फोटाच्या कठीण काळात तिच्या वडिलांनी दिलेल्या पाठिंब्याबद्दलही माही भरभरून बोलली. तिने सांगितलं की, जेव्हा घटस्फोटाची प्रक्रिया सुरू होती, तेव्हा तिच्या वडिलांनी कोणताही प्रश्न न विचारता तिची साथ दिली. “त्या काळात मला कोणीतरी शांतपणे माझ्या बाजूला उभं राहावं असं वाटत होतं. माझ्या वडिलांनी नेमकं तेच केलं. त्यांनी मला कधीच दोष दिला नाही किंवा निर्णयावर प्रश्नचिन्ह उपस्थित केलं नाही,” असं माहीने सांगितलं.  (Mahhi Vij and Jay Bhanushali)

मात्र या मुलाखतीत सर्वाधिक चर्चेत राहिलं ते तिचं हुंडा प्रथेवरचं वक्तव्य. कार्यक्रमादरम्यान हुंड्याच्या विषयावर चर्चा सुरू असताना माहीने तिच्या सासरच्या लोकांबद्दल एक महत्त्वाचा खुलासा केला. ती म्हणाली की, लग्नाच्या वेळी जयच्या कुटुंबीयांनी कोणतीही मागणी केली नव्हती.  (Mahhi Vij and Jay Bhanushali)

“मी स्वतःला खूप नशीबवान समजते. कारण जेव्हा मी जयच्या आईला आणि कुटुंबीयांना विचारलं की त्यांना माझ्याकडून काय अपेक्षा आहेत, तेव्हा त्यांनी स्पष्ट सांगितलं होतं की, ‘तू काहीही घेऊन आली नाहीस तरी चालेल. फक्त आमच्या घराचा आणि कुटुंबाचा भाग बन.’ मला वाटतं ही खूप मोठी गोष्ट होती,” असं माहीने सांगितलं.  (Mahhi Vij and Jay Bhanushali)

याशिवाय तिने पोटगीबाबतही आपलं मत व्यक्त केलं. माहीच्या मते, महिलांनी आर्थिकदृष्ट्या स्वावलंबी असलं पाहिजे. “पोटगी किती मागितली हा मुद्दा नाही. मला स्वतःला पोटगीची संकल्पना फारशी पटत नाही. जो व्यक्ती पैसे कमावतो, ते पैसे त्याच्याकडेच राहायला हवेत. महिलांनी स्वतःच्या पायावर उभं राहायला शिकलं पाहिजे,” असं तिचं मत आहे.

एकूणच, घटस्फोटानंतरही माही विज आणि जय भानुशाली यांच्यातील मैत्रीपूर्ण नातं आणि एकमेकांच्या कुटुंबाबद्दलचा आदर अनेकांसाठी प्रेरणादायी ठरत आहे.