Political News : राज्यात शिक्षक आणि पदवीधर मतदारसंघाच्या निवडणुकांचे बिगुल वाजताच सत्ताधारी महायुतीमध्ये (Political News) जागावाटपावरून जोरदार चुरस पाहायला मिळत आहे. प्रत्येक घटक पक्ष जास्तीत जास्त जागा आपल्या पारड्यात पाडून घेण्यासाठी सर्व शक्ती पणाला लावत असून, विशेषतः पुणे आणि अमरावती मतदारसंघांत राजकीय नाट्य चांगलेच तापले आहे.

पुणे पदवीधर आणि शिक्षक अशा दोन्ही मतदारसंघांवर भाजपने आपला प्रबळ दावा ठोकला आहे. या दोन्ही जागा भाजपच्याच (Political News) असल्याचा पुनरुच्चार मंत्री चंद्रकांत पाटील यांनी केला आहे, तर दुसरीकडे मंत्री जयकुमार गोरे यांनीही भाजपची बाजू अधिक आक्रमकपणे मांडली आहे. महायुती म्हणून एकत्र लढण्याची आमची पूर्ण तयारी असली, तरी वेळ पडल्यास भाजप स्वबळावरही या निवडणुकीला सामोरे जाऊ शकते, असा थेट इशारा गोरे यांनी दिला आहे.

अर्थात, अंतिम निर्णय मुख्यमंत्री देवेंद्र फडणवीस आणि प्रदेशाध्यक्ष रवींद्र चव्हाण घेतील, असे सांगत त्यांनी चेंडू वरिष्ठ नेतृत्वाच्या (Political News) कोर्टात टोलवला आहे. दरम्यान, याच पुणे पदवीधर मतदारसंघावर राष्ट्रवादी काँग्रेस अजित पवार गटाने, तर शिक्षक मतदारसंघावर शिवसेना शिंदे गटाने दावा केल्याने पुण्यातील तिढा चांगलाच गुंतागुंतीचा झाला आहे.

पुण्यातील जागांचा तिढा सुटण्याआधीच अमरावतीमधून महायुतीला मोठा धक्का देणारी बातमी समोर आली आहे. अमरावती शिक्षक मतदारसंघासाठी अधिकृत उमेदवारी जाहीर होण्यापूर्वीच महायुतीमध्ये बंडाचा झेंडा फडकवला गेला आहे. शिवसेना शिंदे गटाचे नेते श्रीकांत देशपांडे यांनी थेट दोन उमेदवारी अर्ज दाखल करत राजकीय वर्तुळात खळबळ उडवून दिली आहे.

राजकीय प्रवासाच्या पहिल्या दिवसापासून आपण शिवसेनेत एकनिष्ठेने काम करत असल्याने पक्षाच्या तिकिटावर आपलाच पहिला अधिकार असल्याचे देशपांडे यांनी स्पष्ट केले. याच हक्काने त्यांनी पहिला अर्ज पक्षाकडून, तर दुसरा अपक्ष म्हणून दाखल केला आहे.

पक्षाने अधिकृत उमेदवारी नाकारली तरी कोणत्याही परिस्थितीत निवडणुकीच्या (Political News) रिंगणातून माघार घेणार नाही, असा ठाम पवित्रा त्यांनी घेतला आहे. तिकीट न मिळाल्यास ‘शिक्षक आघाडी’ या संघटनेच्या माध्यमातून निवडणूक लढवणार असल्याचे सांगत त्यांनी, “शिक्षक मतदार अत्यंत सुज्ञ असून तो यावेळी ताकही फुंकून पिणार आहे,” असा इशारा दिला आहे. देशपांडे यांच्या या आक्रमक बंडखोरीमुळे अमरावती शिक्षक मतदारसंघात महायुतीच्या अधिकृत उमेदवाराच्या अडचणीत मोठी वाढ होण्याची शक्यता वर्तवली जात आहे.