Maharashtra weather update : राज्यात अवकाळी पावसाने पुन्हा जोर धरला असून पुढील पाच दिवस हवामान धोकादायक राहण्याचा इशारा हवामान विभागाने दिला आहे. पुणे, नाशिक, धुळे, जळगावसह मराठवाडा आणि विदर्भातील अनेक भागांमध्ये वादळी वाऱ्यासह गारांचा पाऊस कोसळत आहे. या अचानक बदललेल्या हवामानामुळे जनजीवन विस्कळीत झाले असून शेतीचे मोठे नुकसान झाले आहे.

हवामान विभागाचे पुणे येथील प्रमुख सुदीप कुमार यांनी दिलेल्या माहितीनुसार, राज्यात पुढील पाच दिवस दुपारनंतर वादळी पावसाचा जोर कायम राहणार आहे. काही जिल्ह्यांना ऑरेंज अलर्ट, तर काही ठिकाणी येलो अलर्ट जारी करण्यात आला आहे. विशेषतः मध्य महाराष्ट्र, मराठवाडा आणि विदर्भात गारपीट आणि विजांच्या कडकडाटासह पावसाची शक्यता अधिक आहे.

कमी दाबाचा पट्टा सक्रिय झाल्यामुळे वातावरण अस्थिर झाले आहे. त्यामुळे दररोज दुपारनंतर ढगांची निर्मिती होऊन पावसाचा जोर वाढत आहे. ४ तारखेनंतर पावसाची तीव्रता कमी होण्याची शक्यता हवामान विभागाने व्यक्त केली आहे.

दरम्यान, या पावसाचा सर्वाधिक फटका शेतकऱ्यांना बसत आहे. धाराशिव जिल्ह्यात वादळी वाऱ्यामुळे आंबा पिकाचे मोठे नुकसान झाले असून तब्बल ५० टक्के फळे गळून पडल्याची माहिती समोर आली आहे. त्यामुळे शेतकरी चिंतेत असून पुढील काही दिवस हवामान कसे राहील याकडे त्यांचे लक्ष लागले आहे.

हवामान विभागाने शेतकऱ्यांना विशेष खबरदारी घेण्याचे आवाहन केले आहे. गारपीट आणि विजांच्या कडकडाटामुळे नुकसान होण्याची शक्यता असल्याने मोकळ्या जागेत किंवा झाडाखाली थांबू नये, असेही सांगण्यात आले आहे. तसेच पिकांचे संरक्षण करण्यासाठी आवश्यक उपाययोजना करण्याचा सल्लाही देण्यात आला आहे.

एकूणच, पुढील पाच दिवस राज्यासाठी महत्त्वाचे असून नागरिकांनी सतर्क राहणे गरजेचे आहे.