Maharashtra Rain updates : महाराष्ट्रात मॉन्सूनचा जोर वाढला असून, आज (26 जुलै ) राज्याच्या बहुतांश भागात मुसळधार पावसाने हजेरी लावली आहे. भारतीय हवामान विभागाने (IMD) दिलेल्या अंदाजानुसार, मुंबई, ठाणे, रायगड, पुणे आणि सातारा या जिल्ह्यांमध्ये पुढील 3-4 तासांत मध्यम ते जोरदार पाऊस पडण्याची शक्यता आहे. या भागांसाठी ऑरेंज अलर्ट जारी करण्यात आला असून, नागरिकांना सतर्क राहण्याचा सल्ला देण्यात आला आहे.

रायगडमध्ये सावित्री नदीच्या पाणीपातळीत वाढ, शाळांना सुट्टी

रायगड जिल्ह्यात महाबळेश्वर परिसरात काल रात्री झालेल्या मुसळधार पावसामुळे सावित्री नदीची पाणीपातळी वाढली आहे. पावसाचा जोर कायम राहिल्यास नदी इशारा पातळी ओलांडण्याची भीती आहे. यामुळे रायगडचे जिल्हाधिकारी किशन जावळे यांनी महाड आणि पोलादपूर तालुक्यातील सर्व शाळांना सुट्टी जाहीर केली आहे. हा निर्णय अतिवृष्टीच्या पार्श्वभूमीवर घेण्यात आला आहे.

पालघरला रेड अलर्ट, शेतीला गती

पालघर जिल्ह्यात गेल्या काही दिवसांपासून सातत्याने पाऊस सुरू आहे. आजही पहाटेपासून मुसळधार पावसाला सुरुवात झाली असून, हवामान खात्याने रेड अलर्ट जारी केला आहे. यामुळे जिल्हा प्रशासनाने शाळा, महाविद्यालये आणि अंगणवाड्यांना सुट्टी जाहीर केली आहे. पावसामुळे नदी-नाल्यांना पूर आला असला, तरी शेतीच्या कामांना गती मिळाली असून, 80% भात रोपण्या पूर्ण झाल्या आहेत. प्रशासनाने नागरिकांना सतर्क राहण्याचे आवाहन केले आहे.

विदर्भात पावसाचा कहर, वैनगंगा नदी धोक्याच्या पातळीवर

विदर्भातही पावसाने जोर धरला आहे. चंद्रपूर आणि गोंदिया जिल्ह्यांसाठी रेड अलर्ट, तर नागपूर, भंडारा, वर्धा, गडचिरोली आणि अमरावतीसाठी ऑरेंज अलर्ट जारी करण्यात आला आहे. उर्वरित विदर्भासाठी यलो अलर्ट आहे. गडचिरोलीत कालच्या पावसामुळे अनेक गावांचा संपर्क तुटला असून, आज पुन्हा जोरदार पाऊस झाल्यास परिस्थिती आणखी बिकट होऊ शकते. भंडारा येथील गोसेखुर्द धरणातून सातत्याने पाण्याचा विसर्ग सुरू असल्याने वैनगंगा नदीची पाणीपातळी वाढली आहे. नागपुरात सकाळपासून हलक्या पावसाची रिमझिम सुरू आहे.

मुंबईत समुद्राच्या उंच लाटांचा इशारा

मुंबईत आज दुपारनंतर मुसळधार पावसाची शक्यता आहे. हवामान खात्याने ऑरेंज अलर्ट जारी केला असून, समुद्रात उंच लाटांचा इशारा दिला आहे. पूर्व उपनगरांत ढगाळ वातावरण आणि रिमझिम पाऊस सुरू आहे. नागरिकांना खबरदारी घेण्याचे आवाहन करण्यात आले आहे.