Rain Alert : देशातील हवामानात सध्या वेगाने बदल होताना दिसत आहे. थंडीचा प्रभाव कमी होत असताना काही भागांत अवकाळी पावसाची शक्यता निर्माण झाली आहे. कमी दाबाच्या क्षेत्रामुळे दक्षिण भारतातील काही राज्यांना मुसळधार पावसाचा इशारा देण्यात आला आहे. दक्षिण भारतात मुसळधार पावसाची शक्यता Rain Alert भारतीय हवामान विभाग (IMD) च्या अंदाजानुसार २१ आणि २२ फेब्रुवारी रोजी दक्षिण तामिळनाडू, केरळ आणि माहे परिसरात काही ठिकाणी मुसळधार पाऊस पडू शकतो. वातावरणातील कमी दाबाच्या पट्ट्यामुळे हा पाऊस होण्याची शक्यता वर्तवण्यात आली आहे. तसेच उत्तर भारतातील जम्मू आणि काश्मीर आणि हिमाचल प्रदेश येथे २२ ते २४ फेब्रुवारीदरम्यान पाऊस आणि बर्फवृष्टी होण्याचा अंदाज व्यक्त करण्यात आला आहे. महाराष्ट्रात कसं असेल हवामान? महाराष्ट्र मध्ये उन्हाचा कडाका हळूहळू वाढू लागला आहे. काही भागांत ढगाळ वातावरण राहण्याची शक्यता आहे. दिवसभर तापमानात चढ-उतार पाहायला मिळू शकतो. राज्यातील काही भागांत सोमवारी आणि मंगळवारी हलक्या ते मध्यम स्वरूपाच्या पावसाची शक्यता वर्तवण्यात आली आहे. विशेषतः मध्य महाराष्ट्र, मराठवाडा आणि विदर्भातील काही भागात ढगाळ हवामानासह अधूनमधून सरी कोसळू शकतात. Rain Alert दरम्यान, जेऊर येथे राज्यातील नीचांकी तापमानाची नोंद झाली असून १४.५ अंश सेल्सिअस इतके तापमान नोंदवण्यात आले आहे. हवामानातील या बदलांमुळे शेतकऱ्यांनी पिकांची योग्य काळजी घेण्याचे आवाहन हवामान विभागाकडून करण्यात आले आहे. पुढील काही दिवस राज्यात ‘उन्हाळ्यात पावसाळा’ अशी परिस्थिती पाहायला मिळण्याची शक्यता आहे.
