सांगली : स्थानिक स्वराज्य संस्थेच्या निवडणुका काही महिन्यांवर येऊन ठेपल्या आहेत. या निवडणुकीच्या पार्श्वभूमीवर सगळे पक्ष तयारीला लागले आहेत. मात्र काही महिन्यांपूर्वी पार पडलेल्या विधानसभा निवडणुकीपासून उबाठा पक्षाला लागलेली गळती काही थांबायचे नाव घेईना. त्यातच आता उबाठा पक्षाचे खा. संजय राऊतांनी लोकसभेच्या निवडणुकीच्या वेळी ज्या नेत्यासाठी काँग्रेसला शिंगावर घेतले तोच नेता आता उद्धव ठाकरेंची साथ सोडणार आहे. उबाठा पक्षासाठी हा मोठा धक्का मानला जात आहे.

कोण आहे तो नेता?
लोकसभेच्यावेळी काँग्रेसला शिंगावर घेऊन संजय राऊत ज्यांच्यासाठी भांडले, उद्धव ठाकरेंना उमेदवारी द्यायला तयार केलं, तेच चंद्रहार पाटील शिवसेनेला ‘जय महाराष्ट्र’ करून शिंदेच्या शिवसेनेत प्रवेश करणार आहेत. औद्योगिक मंत्री उदय सामंत यांनी सांगलीला जाऊन चंद्रहार पाटील यांची भेट घेतली होती. त्याच काळात चंद्रहार पाटील यांनी कोकणात जाऊन उपमुख्यमंत्री एकनाथ शिंदे यांची भेट घेतली. उभय नेत्यांमध्ये प्रवेशासंदर्भात चर्चा झाली. अखेर सोमवारी शिंदे यांच्या प्रमुख उपस्थितीत चंद्रहार पाटील शिवसेनेत प्रवेश करणार आहेत.

चंद्रहार पाटलांना मिळणार मोठी जबाबदारी
डबल महाराष्ट्र केसरी चंद्रहार पाटील यांनी लोकसभा निवडणूक काळात उद्धव ठाकरे यांच्या नेतृत्वाखालील शिवसेना पक्षात प्रवेश केला होता. शिवसेनेकडून सांगली मतदारसंघातून त्यांनी लोकसभेची निवडणूक लढवली होती मात्र या निवडणुकीत अपक्ष उमेदवार विशाल पाटील यांनी त्यांचा पराभव केला. या निवडणुकीनंतर चंद्रहार पाटील पक्षात एकटे पडल्याची चर्चा सुरु झाली. त्याच काळात एकनाथ शिंदे यांच्या पक्षातून चंद्रहार पाटील यांना मोठे आश्वासन मिळाले. एकनाथ शिंदे यांच्याकडून मोठ्या जबाबदारीचे संकेत मिळाल्यानंतर त्यांनी पक्षप्रवेशास संमती दर्शवली.

संजय राऊत तोंडघशी पडले
चंद्रहार पाटील हे शिवसेना नेते खासदार संजय राऊत यांचे अतिशय निकटवर्तीय मानले जातात. त्यांनीच चंद्रहार पाटलांना शिवसेनेत आणले. सगळ्यांचा विरोध असतानाही काँग्रेसला अंगावर घेऊन संजय राऊतांनी चंद्रहार पाटलांना लोकसभेचे तिकीट मिळवून दिले. मात्र त्या निवडणुकीत चंद्रहार पाटलांचा पराभव झाला. यानंतर आता ते शिंदेच्या शिवसेनेत प्रवेश करत आहेत. त्यामुळे संजय राऊत तोंडघशी पडले आहेत.

कोण आहेत चंद्रहार पाटील?
चंद्रहार पाटील हे सांगली, महाराष्ट्र येथील प्रसिद्ध कुस्तीपटू आणि राजकारणी आहेत. त्यांना “डबल महाराष्ट्र केसरी” म्हणून ओळखले जाते, कारण त्यांनी दोनदा महाराष्ट्र केसरी ही मानाची कुस्ती स्पर्धा जिंकली आहे. ते मूळचे शेतकरी कुटुंबातील असून, त्यांनी कुस्ती क्षेत्रात मोठी कीर्ती मिळवली आहे. संजय राऊत यांचे अतिशय निकटवर्तीय नेते म्हणून चंद्रहार यांची ओळख आहे.

चंद्रहार पाटलांची राजकीय कारकीर्द
चंद्रहार पाटील यांनी 2024 मध्ये शिवसेना (उद्धव बाळासाहेब ठाकरे) पक्षात प्रवेश केला आणि सांगली लोकसभा मतदारसंघातून महाविकास आघाडीचे उमेदवार म्हणून निवडणूक लढवली.सांगली लोकसभा मतदारसंघात त्यांना 60,860 मते मिळाली, परंतु त्यांचे डिपॉझिट जप्त झाले कारण त्यांना पुरेशी मते मिळाली नाहीत.

या निवडणुकीतील पराभवानंतर त्यांनी सामाजिक माध्यमांवर “वेळ प्रत्येकाची येते, आज तुमची आहे, उद्या माझी येईल” असा संदेश दिला होता. 2025 मध्ये त्यांनी कुस्ती क्षेत्रातील राजकारण आणि पैलवानांवरील अन्यायाविरोधात सांगली जिल्हाधिकारी कार्यालयासमोर एकदिवसीय लाक्षणिक उपोषण केले. त्यांनी “एक राज्य-एक खेळ-एक संघटना” ही संकल्पना राबवण्याची मागणी केली.