NCP Merger : महाराष्ट्राच्या राजकारणात गेल्या काही दिवसांपासून दोन्ही राष्ट्रवादी काँग्रेस (NCP Merger) एकत्र येणार का, या एकाच प्रश्नाभोवती चर्चांचे मोठे वादळ उठले होते. अजित पवार यांच्या गटातील प्रमुख नेत्यांनी ज्येष्ठ नेते शरद पवार यांची घेतलेली भेट आणि त्यानंतर पार्थ पवार व शरद पवार यांच्यात एकाच दिवशी पार पडलेल्या दोन मोठ्या बैठकांमुळे विलीनीकरणाच्या शक्यतेला प्रचंड वेग आला होता. राजकीय वर्तुळात अनेक तर्कवितर्क लढवले जात असतानाच, आता या संपूर्ण प्रकरणावर एक मोठी आणि निर्णायक घडामोड समोर आली आहे.

शरद पवार यांच्या पक्षातील एका वरिष्ठ नेत्याने दिलेल्या माहितीनुसार, सध्या दोन्ही राष्ट्रवादींच्या विलीनीकरणावर (NCP Merger) कोणतीही चर्चा सुरू नाही. सद्यस्थितीत अशी राजकीय परिस्थिती अस्तित्वात नसून, विलीनीकरणाचा कोणताही प्रस्ताव विचाराधीन नसल्याचे त्यांनी स्पष्ट केले आहे. त्यामुळे गेल्या काही दिवसांपासून सुरू असलेल्या चर्चांना आता पूर्णविराम मिळण्याची चिन्हे दिसत आहेत.

या सगळ्या राजकीय नाट्याची सुरुवात शरद पवार यांच्या प्रकृती अस्वास्थ्यामुळे झाली. ते रुग्णालयात असताना अजित पवार गटाचे नेते प्रफुल्ल पटेल यांनी त्यांची सदिच्छा भेट घेतली आणि तिथूनच या संशयाची ठिणगी पडली. त्यानंतर लगेचच पार्थ पवार यांनी शरद पवारांची भेट घेत तब्बल तीन ते चार तास खलबते केली. या बैठकीला दोन्ही बाजूंचे काही बडे नेतेही उपस्थित असल्याने संशयाचे वातावरण अधिकच गडद झाले होते.

या सगळ्या घडामोडी सुरू असतानाच खासदार सुनील तटकरे यांच्या एका विधानाने राजकीय वर्तुळात प्रचंड खळबळ उडवून दिली होती. विलीनीकरणाची शक्यता वर्तवत त्यांनी केलेल्या विधानामुळे अनेक भुवया उंचावल्या.

त्यापूर्वी अजित पवार गटाच्या प्रमुख नेत्यांनी केंद्रीय गृहमंत्री अमित शाह यांची भेट घेतल्याचेही समोर आले होते, ज्यामुळे उपमुख्यमंत्री सुनेत्रा पवार यांच्यावर दबाव तंत्र वापरले जात असल्याचा तर्कही लढवला गेला. मात्र आता शरद पवार यांच्या पक्षातील नेतृत्वानेच विलीनीकरणाची (NCP Merger) चर्चा स्पष्टपणे फेटाळून लावल्याने हे राजकीय नाट्य नेमके कोणत्या वळणावर थांबणार, याकडे संपूर्ण राज्याचे लक्ष लागले आहे.