Maharashtra Politics : राज्यात सध्या विधान परिषद निवडणुकीचे वारे जोरात वाहत असून राजकीय वातावरण (Maharashtra Politics) कमालीचे तापले आहे. या निवडणुकीच्या पार्श्वभूमीवर सर्वच राजकीय पक्षांनी आपली मोर्चेबांधणी तीव्र केली असून, मतांची बेगमी करण्यासाठी नगरसेवकांना आपल्या बाजूने वळवण्याचे प्रयत्न युद्धपातळीवर सुरू आहेत.

निवडणुकीच्या या धामधुमीत मोठ्या प्रमाणावर राजकीय घोडेबाजार आणि पक्षांतराचे नाट्य पाहायला (Maharashtra Politics) मिळत आहे. यामध्ये सध्यातरी सत्ताधारी महायुतीला मोठे यश मिळताना दिसत असून, विरोधकांना मात्र एकामागून एक धक्के बसत आहेत.

गोंदिया, अकोला, हिंगोली आणि बुलढाणा या जिल्ह्यांमध्ये काँग्रेस आणि शरद पवार यांच्या राष्ट्रवादी काँग्रेसला मोठे खिंडार पडले असून, अनेक नगरसेवक सत्ताधाऱ्यांच्या गळाला लागल्याने राजकीय वर्तुळात प्रचंड खळबळ उडाली आहे.

गोंदियात जिल्हा परिषद सदस्य आणि नगरसेवक फुटण्याच्या तयारीत, ‘सहली’चे राजकारण सुरू

गोंदिया-भंडारा विधान परिषद निवडणुकीच्या पार्श्वभूमीवर स्थानिक स्वराज्य संस्थांमधील लोकप्रतिनिधी फोडण्याचे राजकारण रंगात आले आहे. गोंदिया जिल्ह्यातील देवरी तालुक्यातील काँग्रेस पक्षाचे एक जिल्हा परिषद सदस्य आणि दोन नगरसेवक हे भाजपच्या गळाला लागल्याची खात्रीशीर माहिती सूत्रांकडून मिळाली आहे.

विशेष म्हणजे, पक्षांतराची ही शक्यता केवळ चर्चेपुरती मर्यादित नसून, हे तिन्ही लोकप्रतिनिधी भाजपच्या इतर नगरसेवकांसोबत गुप्त ठिकाणी सहलीला गेल्याचे समजते. या घडामोडींमुळे गोंदिया आणि भंडारा जिल्ह्यातील काँग्रेसच्या गोटात चिंतेचे वातावरण पसरले असून राजकीय हालचालींना वेग आला आहे.

१० नगरसेवकांचा शिंदेसेनेत प्रवेश

अकोला जिल्ह्यात महायुतीमधील अंतर्गत आणि बाहेरील पक्षांना धक्का देणारी एक मोठी घडामोड घडली आहे. बार्शी टाकळी नगरपंचायतीमधील तब्बल १० नगरसेवकांनी एकत्र येत मुख्यमंत्री एकनाथ शिंदे यांच्या उपस्थितीत शिवसेनेत (शिंदे गट) जाहीर प्रवेश केला. यामध्ये काँग्रेसच्या ४, अजित पवार यांच्या राष्ट्रवादी काँग्रेसच्या २ आणि ४ अपक्ष नगरसेवकांचा समावेश आहे.

शिवसेना जिल्हाप्रमुख चंद्रशेखर पांडे गुरुजी यांच्या पुढाकाराने हा संपूर्ण पक्षप्रवेश मुंबईतील मुख्यमंत्र्यांच्या ‘नंदनवन’ या अधिकृत निवासस्थानी पार पडला. विधान परिषद निवडणुकीच्या तोंडावर अकोल्यात झालेल्या या ‘खेला’मुळे काँग्रेस आणि अजित पवार गटाला मोठा झटका बसला आहे.

शरद पवार गटाचे ६ नगरसेवक ‘नॉट रिचेबल’

नागपूर विधान परिषद निवडणुकीची लढत अत्यंत प्रतिष्ठेची झाली आहे. महाविकास आघाडीकडून काँग्रेसचे अतुल लोंढे हे अधिकृत उमेदवार म्हणून मैदानात आहेत, तर महायुतीकडून भाजपचे राजीव पोतदार त्यांच्यासमोर उभे आहेत. अशा अटीतटीच्या लढतीत (Maharashtra Politics) प्रत्येक मत महत्त्वाचे झाले असतानाच, हिंगणा नगरपंचायतीमधील राष्ट्रवादी काँग्रेस (शरद पवार गट) चे ६ नगरसेवक अचानक ‘नॉट रिचेबल’ झाले आहेत. मतदानाच्या तोंडावरच हे नगरसेवक गायब झाल्याने महाविकास आघाडीचे टेन्शन कमालीचे वाढले असून, याचा फटका लोंढे यांच्या उमेदवारीला बसण्याची शक्यता वर्तवली जात आहे.

बुलढाण्यातील मेहकरमध्ये मोठा राजकीय स्फोट

बुलढाणा जिल्ह्यातील मेहकर नगरपालिकेत जिल्ह्यासह राज्याचे लक्ष वेधून घेणारी एक मोठी उलथापालथ झाली आहे. येथील काँग्रेसच्या ११ पैकी तब्बल ९ नगरसेवकांनी थेट शिवसेना (उद्धव बाळासाहेब ठाकरे) पक्षाचे नगराध्यक्ष किशोर गारोळे यांच्या नेतृत्वावर विश्वास दाखवत त्यांना अधिकृत पाठिंबा जाहीर केला आहे. या नगरसेवकांनी पत्रकार परिषद घेऊन आपल्या निर्णयाची घोषणा केली.

मेहकरमधील सत्तासमीकरणे बदलली
यापूर्वी झालेल्या मेहकर नगरपालिका निवडणुकीत शिवसेना (ठाकरे गट), शिवसेना (शिंदे गट) आणि काँग्रेस हे तिन्ही पक्ष स्वतंत्र लढले होते. त्यावेळी ठाकरे गटाचे ७ नगरसेवक निवडून आले होते आणि त्यांनी नगराध्यक्षपद मिळवले होते. काँग्रेसकडे ११ तर शिंदेसेनेकडे ९ नगरसेवक होते. सुरुवातीला सत्ता स्थापनेसाठी काँग्रेस आणि शिंदेसेनेने एकत्र येत गट स्थापन केला होता आणि उपाध्यक्षपदासह सर्व समित्या आपल्या ताब्यात ठेवल्या होत्या.

मात्र, केवळ सहा महिन्यांतच शहराच्या विकासाचे कारण देत काँग्रेसच्या गटात मोठी फूट पडली. नगरपालिका उपाध्यक्षांसह ९ नगरसेवकांनी आता थेट ठाकरे गटाला पाठिंबा दिला आहे. यामुळे नगरपालिकेत महाविकास आघाडीचे संख्याबळ ७ वरून थेट १६ वर पोहोचले असून, त्यांना स्पष्ट बहुमत मिळाले आहे. तर दुसरीकडे विरोधी बाकावर असलेल्या शिंदे सेनेला हा अतिशय मोठा धक्का मानला जात आहे.

केंद्रीय मंत्र्यांच्या ‘होम टाऊन’मध्ये वर्चस्व
मेहकर हा मतदारसंघ केंद्रीय राज्यमंत्री प्रतापराव जाधव यांचे ‘होम टाऊन’ (गृह मैदान) म्हणून ओळखला जातो. या मतदारसंघातून त्यांचा आमदार सलग तीन वेळा निवडून आलेला आहे. अशा बालेकिल्ल्यात आता आमदार ठाकरे गटाचा आणि नगरपालिकेची सत्ताही पूर्णपणे ठाकरे गटाच्या वर्चस्वाखाली आल्याने, या राजकीय भूकंपाची चर्चा संपूर्ण महाराष्ट्रभर रंगली आहे.