Maharashtra Politics : गेल्या काही वर्षांत महाराष्ट्राच्या राजकारणाने (Maharashtra Politics) अनेक मोठे राजकीय भूकंप आणि नाट्यमय घडामोडी पाहिल्या आहेत. २०२२ मध्ये शिवसेनेत पडलेली मोठी फूट आणि एकनाथ शिंदे यांनी भाजपसोबत केलेली सत्तास्थापना यानंतर राज्यातील राजकीय समीकरणे पूर्णपणे बदलली.

मात्र, आता पुन्हा एकदा महाराष्ट्राच्या राजकारणात मोठ्या घडामोडी घडण्याचे (Maharashtra Politics) संकेत मिळत आहेत. ठाकरे गटाच्या दोन प्रमुख नेत्यांनी शिंदे गटातील नाराज नेत्यांना थेट घरवापसीची ऑफर दिली आहे, तर दुसरीकडे शिंदे गटाचे मंत्री अब्दुल सत्तार यांनीही दोन्ही शिवसेना एकत्र येण्याबाबत मोठे वक्तव्य केल्याने राजकीय वर्तुळात खळबळ उडाली आहे.

संजय राऊत यांची थेट ऑफर

शिंदे गटातील काही नेते सध्याच्या राजकीय परिस्थितीवर (Maharashtra Politics) नाराज असल्याच्या चर्चांवर शिवसेना (उद्धव बाळासाहेब ठाकरे) पक्षाचे खासदार संजय राऊत यांनी मोठी प्रतिक्रिया दिली आहे. राऊत म्हणाले की, “प्रत्येकाचे वैयक्तिक मत असते. पण मला असे वाटते की, ज्या पद्धतीने भारतीय जनता पक्ष (BJP) सध्या त्यांना अपमानित करत आहे, ते पाहता जर कोणाला पश्चाताप झाला असेल तर ते परत येऊ शकतात. ज्यांना असे वाटते की आपल्याकडून चूक झाली, आपल्याला भ्रमात ठेवले गेले आणि आपण बहकलो, त्यांनी नक्कीच उद्धव ठाकरे यांच्या नेतृत्वाखाली परत यायला हवे.”

अंबादास दानवे यांचा पाठिंबा

संजय राऊत यांच्या या विधानाचे विधान परिषदेचे विरोधी पक्षनेते अंबादास दानवे यांनीही समर्थन केले आहे. “संजय राऊत यांनी मांडलेली भूमिका अगदी योग्य आहे. ज्यांना-ज्यांना आपल्या निर्णयाचा पश्चाताप झाला आहे, त्यांनी घेतलेल्या राजकीय भूमिकेचा पुन्हा एकदा गांभीर्याने विचार करायला हवा,” असे आवाहन दानवे यांनी शिंदे गटातील नेत्यांना केले आहे.

महायुतीत मिठाचा खडा? अब्दुल सत्तारांच्या विधानाने वाढवली धाकधूक

या सर्व चर्चांना उधाण येण्याचे मुख्य कारण म्हणजे छत्रपती संभाजीनगर विधान परिषद निवडणूक ठरली आहे. येथे शिंदे गटाचे नेते आणि मंत्री अब्दुल सत्तार यांच्या मुलाने थेट भाजपच्या अधिकृत उमेदवाराविरोधात उमेदवारी अर्ज दाखल केला आहे. यामुळे भाजप आणि शिंदे गटामधील अंतर्गत मतभेद चव्हाट्यावर आले आहेत. या पार्श्वभूमीवर, दोन्ही शिवसेना पुन्हा एकत्र येणार का? असा प्रश्न विचारला असता अब्दुल सत्तार यांनी अत्यंत सूचक वक्तव्य केले:

“माझ्या मते, आता दोन्ही शिवसेना पक्षांनी एकत्र आले पाहिजे. आमचे नेते एकनाथ शिंदे यांनी जर एकत्र येण्याचा निर्णय घेतला, तर आम्हाला कोणाचीही परवानगी घेण्याची किंवा मत विचारण्याची गरज भासणार नाही. आम्ही एका मिनिटात त्यासाठी तयार होऊ. आमचे नेते जो निर्णय घेतील, तो आम्हाला पूर्णपणे मान्य असेल.”

एकीकडे ठाकरे गटाकडून ‘पश्चाताप’ झालेल्यांना परत येण्याची (Maharashtra Politics) साद घातली जात आहे, तर दुसरीकडे भाजपसोबतच्या अंतर्गत मतभेदांमुळे शिंदे गटातील नेत्यांकडून दोन्ही शिवसेना एकत्र येण्याची इच्छा व्यक्त केली जात आहे. यामुळे आगामी काळात महाराष्ट्राच्या राजकारणात पुन्हा एकदा मोठी उलथापालथ होण्याची शक्यता नाकारता येत नाही.