Chhagan Bhujbal । Anandacha Shidha – राज्य सरकारने निवडणुकीपुर्वी लाडकी बहिण योजना जाहीर करताना महिलांना ओवाळणी घातली होती. मात्र, याच ओवाळणीमुळे इतर योजनांवर मात्र संकट कोसळताना दिसत आहे. तत्कालीन मुख्यमंत्री एकनाथ शिंदे यांनी आनंदाचा शिधा ही योजना सुरु केली होती.

त्याला गोर-गरीब नागरिकांनी देखील चांगला प्रतिसाद दिला होता. मात्र, यावर्षी सणासुदीच्या काळात मिळणारा आनंदाचा शिध्यावर विरजण पडणार आहे. याची कबुली थेट अन्न पुरवठा मंत्री छगन भुजबळ यांनी दिली आहे.

लाडकी बहीण योजनेसाठी राज्यातील तिजोरीतील एकदम ४५ हजार कोटी रुपये लाडकी बहीण योजनेसाठी द्यावे लागणार आहेत. त्यामुळे त्याचा परिणाम इतर योजनांवर होत आहे. आम्ही राज्याचे उत्पन्न वाढविण्याचा प्रयत्न करत आहोत. सध्या योजनांच्या निधीच्या बाबतीत मागे-पुढे होत आहे, त्यामुळे जसा निधी उपलब्ध होईल, त्या प्रमाणे योजना चालवणार आहोत.

मात्र, ते ४५ हजार कोटी एकदम द्यावे लागणार असल्याने आनंदाचा शिधा देवू शकत नाही, अशी स्पष्ट कबुली छगन भुजबळ यांनी दिली. त्यामुळे आनंदाच्या शिध्याला राज्याने कात्री लावल्याचे स्पष्ट झाले आहे.

आनंदाचा शिधा योजनेच्या माध्यमातून सणासुदींच्या निमित्ताने राज्यातील रेशनकार्ड धारकांना फक्त शंभर रुपयात काही जीवनावश्यक वस्तू देण्यात येत होत्या. त्यामध्ये एक किलो साखर, एक किलो रवा, एक किलो चना डाळ, एक लिटर पामतेल देण्यात येत होते. मात्र यावेळी तो उपलब्ध करुन देणे शक्य होणार नाही.

या संदर्भात बोलताना भुजबळ म्हणाले की, आनंदाचा शिधा द्यायचा असेल तर त्यासाठी सुमारे दोन ते तीन महिने आधी टेंडर काढावे लागते. आता तरी ते शक्य होणार नाही. वर्षाला शिवभोजन थाळीसाठी देखील १४० कोटी रुपये तर आनंदाच्या शिध्यासाठी ५५० कोटी रुपये लागत होते, मात्र यावेळी राज्याने विभागासाठी अवघ्या २० कोटींचा निधी उपलब्ध करुन दिला असल्याचे भुजबळांनी सांगितले.