Maharashtra Assembly elections 2024 – जम्मू-काश्मीर आणि हरियाणामध्ये निवडणुकीच्या तारखा जाहीर झाल्या आहेत. महाराष्ट्रातील निवडणुकीच्या तारखाही आज जाहीर होतील, असे मानले जात होते. मात्र, आज निवडणूक आयोगाने दोनच राज्यात निवडणुका घेण्याची घोषणा केली आहे. याचे कारणही निवडणूक आयोगाने दिले आहे.

महाराष्ट्र विधानसभा निवडणुकीबाबत निवडणूक आयोगाला विचारले असता, चार ठिकाणी एकाच वेळी निवडणुका घेण्यासाठी सुरक्षा दलांची तैनाती हाही मुद्दा असल्याचे त्यांनी सांगितले. जम्मू-काश्मीरमध्येही निवडणुका होणार आहेत, त्यामुळे दोन राज्यांमध्ये वेगवेगळ्या वेळी निवडणुका घेण्याचा निर्णय निवडणूक आयोगाने घेतला आहे.

मुख्य निवडणूक आयुक्त राजीव कुमार यांना पत्रकार परिषदेत महाराष्ट्र विधानसभा निवडणुकीसंदर्भात प्रश्न विचारण्यात आला. त्याला उत्तर देताना ते म्हणाले की, याआधी गेल्या वेळी महाराष्ट्र आणि हरियाणाच्या निवडणुका एकाच वेळी झाल्या होत्या. त्यावेळी जम्मू-काश्मीरमध्ये निवडणुका होणार नव्हत्या. यावर्षी चार ठिकाणी निवडणुका होणार आहेत, त्यामुळे सुरक्षा दलांची तैनाती आणि जम्मू-काश्मीरमध्ये सुरक्षा दलांची मोठी मागणी लक्षात घेऊन आम्ही दोन राज्यांमध्ये वेगवेगळ्या वेळी निवडणुका घेण्याचा निर्णय घेतला आहे.

जम्मू-काश्मीरमधील निवडणुकीमुळे सुरक्षा दल त्याठिकाणी असणार आहे. त्यामुळे महाराष्ट्रातील निवडणूक त्यानंतर जाहीर करण्यात येईल. तसेच महाराष्ट्रात पाऊस, गणपती उत्सव आणि पितृपक्षामुळे महाराष्ट्रातील निवडणूक प्रक्रिया जम्मू-काश्मीर आणि हरियाणानंतर करण्यात येणार, असे राजीव कुमार यांनी स्पष्ट केले. दरम्यान, यावर्षी जम्मू-काश्मीर, हरियाणा, महाराष्ट्र आणि झारखंडमध्ये विधानसभा निवडणुका होणार आहेत. महाराष्ट्र विधानसभेची मुदत ही 26 नोव्हेंबर रोजी संपणार आहे.

जम्मू काश्मीर, हरियाणा निवडणुकीच्या तारखा – 

हरियाणामध्ये एक टप्प्यात निवडणूक होणार असून 1 ऑक्टोबर रोजी मतदान घेण्यात येईल. तर जम्मू काश्मिरमध्ये तीन टप्प्यात निवडणूक होणार आहे. या दोन्ही निवडणुकांचा निकाल 4 ऑक्टोबर रोजी जाहीर होणार आहे. केंद्रीय निवडणूक आयोगाचे मुख्य आयुक्त राजीव कुमार म्हणाले की, जम्मू काश्मिरमध्ये पहिला टप्पा 18 सप्टेंबरला, दुसरा टप्पा 25 सप्टेंबरला आणि तिसऱ्या टप्प्यात 1 ऑक्टोबरला मतदान होणार आहे. त्याचा निकाल 4 ऑक्टोबरला लागणार आहे. दोन्ही राज्यांत विधानसभेच्या 90 जागा आहेत.