मुंबई : महाराष्ट्र राज्याचे २१ वे मुख्यमंत्री म्हणून भाजप नेते ‘देवेंद्र फडणवीस’ हे आज (दि. ५) शपथ घेणार आहेत. आझाद मैदानावर हा शपथविधी सोहळा पार पडणार आहे. या शपथविधी सोहळ्याला पंतप्रधान नरेंद्र मोदी यांच्यासह अनेक मान्यवरांच्या उपस्थिती असणार आहे. शपथविधीची जय्यत तयारी करण्यात आली असून देशभरातील अनेक दिग्गज नेते या सोहळ्याला उपस्थित राहणार आहेत.

विधानसभा निवडणूक निकालात महायुतीला बहुमत मिळल्यानंतर तब्बल दहा दिवस मुख्यमंत्री कोण होणार? हे स्पष्ट होत नव्हते. अखेर काल (दि. ४) देवेंद्र फडणवीस यांच्या नावावर शिक्कामोर्तब करण्यात आले. दरम्यान, आजचा शपथविधी झाल्यानंतर येत्या ११ डिसेंबर रोजी फडणवीस सरकारचा पहिला मंत्रिमंडळ विस्तार होणार असल्याचं सांगितलं जात आहे. या मंत्रिमंडळ विस्तारावेळी ३३ जणांचा शपथविधी होईल, अशी माहिती देखील समोर आली आहे.

येत्या ११ डिसेंबर रोजी सकाळी इतर मंत्र्यांचा शपथविधी होण्याची शक्यता असल्याची मोठी माहिती शिवसेनेचे नेते आणि आमदार भरत गोगावले यांनी दिली. भरत गोगावले यांनी मंत्रिमंडळ विस्तारावर भाष्य करताना असे म्हटले की, “आज एक मुख्यमंत्री आणि दोन उपमुख्यमंत्री शपथ घेतील. पंतप्रधानांचा वेळ कमी मिळाल्याने तिघांचा शपथविधी होईल. कोणाला किती खाती मिळतील चर्चेअंती तिढा सुटेल, असं त्यांनी म्हटलं.

भविष्यात काही चांगल्या गोष्टी करण्यासाठी काही निर्णय सावकाश घेतले जातील. यावेळी आम्हाला संधी मिळेल. आपले सवंगडी सत्तेत आले तर पक्षाचा फायदा नक्की होईल. नाराजी संपली म्हणूनच राज्यपालांना स्वत: जाऊन पाठिंबा दर्शवला आहे.’ असं देखील ते यावेळी म्हणाले. यावेळी ते माध्यमांशी संवाद साधत होते.