जालना – महाराष्ट्रात ज्यांनी आमच्यावतीने उमेदवारी अर्ज दाखल केले त्यांनी तातडीने एकत्र बसून बैठक घ्या, या बैठकीत सर्वांनी मिळून एक उमेदवार ठरवा. आपल्यासाठी ही चांगली संधी आलेली आहे, ओढातानीच्या नादात ही संधी घालू नका, असे आवाहन मनोज जरांगे यांनी उमेदवारांना केले आहे. त्यामुळे, आता मनोज जरांगे विधानसभेच्या रणांगणात उतरले असल्याचे स्पष्ट झाले आहे. (Maharashtra Assembly Election 2024)

विधानसभा निवडणुकीच्या पार्श्वभूमीवर मराठा, मुस्लिम आणि दलित समीकरण एकत्र करून निवडणुकीला सामोरे जाण्याची घोषणा मनोज जरांगे यांनी केली आहे. मात्र एकाच मतदारसंघात मराठा आंदोलनाच्या माध्यमातून अनेक उमेदवार रिंगणात उतरले आहेत. या उमेदवारांनी अपक्ष म्हणून आपला उमेदवारी अर्ज दाखल केला आहे. यातील एकाच उमेदवाराला एका मतदारसंघात मनोज जरांगे पाठिंबा देणार आहेत. तोच पक्षाचा अंतिम उमेदवार असेल. मात्र याबाबत निर्णय घेण्यासाठी सर्व इच्छुकांनी आपसात चर्चा करून एक नाव अंतिम करण्याचा सल्ला मनोज जरांगे यांनी दिला आहे. (Manoj Jarange)

मनोज जरांगे यांनी आंतरवाली सराटी येथे मुस्लिम धर्मगुरू आणि दलित समाजातील ज्येष्ठ नेत्यांची एकत्रित बैठक बोलावली होती. या बैठकीत मुस्लिम, मराठा आणि दलित यांनी एकत्र निवडणुकीला सामोरे जाण्याचा निर्णय घेतला. यात जे मतदारसंघांमध्ये राखीव आहेत त्या मतदारसंघात दलित समाजाच्या उमेदवाराला पाठिंबा दिला जाणार आहे. तर इतर ठिकाणी मराठा समाजाचे उमेदवार असतील.

यासोबतच इतर छोट्या मोठ्या सर्व जाती-धर्माच्या लोकांना एकत्र घेणार असल्याचे मनोज जरांगे यांनी जाहीर केले आहे. त्यातच आता एका मतदारसंघात अनेक इच्छुक उमेदवार आपण मनोज जरांगे पाटील यांच्या वतीने निवडणुकीला सामोरे जात असल्याचा दावा करत आहेत. या सर्व उमेदवारांनी एकत्र चर्चा करून एका जण अंतिम करण्याचे आवाहन मनोज जरांगे यांनी केले आहे.