Maharashtra Police :  पोलीस, कारागृह, अग्निशमन तसेच होमगार्ड आणि नागरी संरक्षण क्षेत्रात उल्लेखनीय कामगिरी करणाऱ्या महाराष्ट्रातील अधिकारी आणि कर्मचाऱ्यांना राष्ट्रपती पोलीस पदक आणि गुणवत्तापूर्ण सेवा पदक जाहीर करण्यात आले आहे. स्वातंत्र्यदिनाच्या पूर्वसंध्येला केंद्रीय गृह मंत्रालयाने १४ ऑगस्ट रोजी याबाबत घोषणा केली.

राष्ट्रपतींच्या मंजुरीनंतर गृह मंत्रालयाने पदकांसाठी निवड झालेल्या अधिकारी आणि कर्मचाऱ्यांची यादी जाहीर केली आहे.

महाराष्ट्रातील ५ अधिकाऱ्यांची निवड –

राष्ट्रपती उत्कृष्ट सेवा पदकासाठी महाराष्ट्रातील अपर पोलीस महासंचालक शिरीष रवींद्र जैन, उपपोलीस अधीक्षक सुभाष नानासाहेब भुजबळ आणि सहाय्यक पोलीस उपनिरीक्षक संजय राजाराम वायचळे यांची निवड करण्यात आली आहे.

कारागृह सेवा गटात सुभेदार संजीव सखाराम घाणेकर आणि हवालदार संजय राजारामजी तळवारे यांची गुणवत्तापूर्ण सेवा पदकासाठी निवड झाली आहे.

पोलीस सेवेत ३७ जणांचा सन्मान –

पोलीस सेवा श्रेणीत महाराष्ट्रातील ३७ अधिकारी आणि कर्मचाऱ्यांना पदक जाहीर करण्यात आले आहे. यामध्ये उपपोलीस महानिरीक्षक संजय बाजीराव जाधव, उपपोलीस महानिरीक्षक विजयकुमार गोपीनाथ मगर, पोलीस अधीक्षक दिगंबर पांडुरंग प्रधान, उपपोलीस अधीक्षक प्रशांत कुलकर्णी, भागीरथ देशमुख, प्रवीण तेजले, मनोजकुमार यादव, तसेच पोलीस निरीक्षक वैभवकुमार जाधव, संतोष बारगे, विश्वजीत कागिंडे, जितेंद्र कदम, विनोद पाटील आणि प्रदीप चौगावकर यांचा समावेश आहे. याशिवाय सहाय्यक पोलीस उपनिरीक्षक, पोलीस उपनिरीक्षक आणि हेड कॉन्स्टेबल यांचाही सन्मान करण्यात आला आहे.

अग्निशमन, होमगार्ड आणि कारागृह सेवेलाही गौरव

अग्निशमन सेवेत उल्लेखनीय कामगिरीबद्दल मुख्य अग्निशमन अधिकारी शंकर उत्तम मिसाळ आणि अग्निशामक शैलेश महादेव जगताप यांची निवड झाली आहे.

गृहरक्षक व नागरी संरक्षण क्षेत्रातील कार्यासाठी पोपट रामजी सांगडे, अशोक नामदेव इंगळे आणि मनोज सदाशिव बारसागडे यांचा सन्मान करण्यात येणार आहे.

कारागृह सेवेसाठी अधीक्षक विकास हनुमंत राजनाळवार आणि हवालदार महेश लक्ष्मण गडनाईक यांनाही पदक जाहीर करण्यात आले आहे.